Azərbaycan mətbəxi zəngin olduğu qədər də qədimdir. Hər təamın öz tarixi, öz yeri və əhəmiyyəti var. Hər yeməyin də məxsusi hazırlandığı, torpağından, havasından dad aldığı bölgələr mövcuddur. Sizə təqdim etdiyimiz Qarabağ kətəsi də xanımların əlinin hənirtisi, muğamın sehrli qüvvəsi və “Şuşanın dağları”nın zümzüməsi ilə hazırlananda xüsusi dada, duza minir və süfrələrimizə günəşin istisini gətirir.

Qarabağ mətbəxinin ləziz nemətlərini təqdim etməkdə məqsədimiz, xanımlarımızın Müzəffər Ordumuzun tarixi qələbə gününə hazırlaşaraq, ən dadlı təamları məhz həmin gün, Cıdır düzündə bişirərək paylaşmaq arzumuzla təqdim edilir.

Qələbəmiz yaxındadır. Qarabağ Azərbaycandır!

Yumşaq xəmiri və çox ləzzətli içliyi olan Qarabağ kətəsini gəlin birlikdə hazırlayaq.

Lazım olan ərzaqlar:

Xəmir üçün (3 ədəd böyük kətə alınır)

• 3 yumurta (2si xəmirə, biri üzəri üçün)
• 50 qr kərər yağı
• 2 xörək qaşığı şəkər tozu
• 3 stəkan un (təxmini)
• 1 çay qaşığı maya
•  bir çimdik duz
• təxminən yarım stəkan su

İç üçün

• 1 stəkan un
• 1 stəkandan bir qədər az şəkər tozu
• 50 qr kərə yağı

Unu kombayn qabına ələyib, üzərinə yumurta, duz, şəkər tozu, maya, əridilmiş kərə yağı əlavə edirik.

Xəmir yoğurma başlığı ilə az-az suyu əlavə edərək xəmiri 5-7 dəqiqəyə yoğururuq. Əldə yoğursanız eyni qayda ilə ərzaqların üzərinə az-az su əlavə edərək hazırlayın. Xəmirin üzərini bağlayıb isti yerdə 1,5 – 2 saat ərzində özünə gəlməyə qoyun.

İçlik üçün əridilmiş kərə yağı və şəkər tozunu qarışdırın, üzərinə unu əlavə edib əlinizlə ovuntu halına salın.

Xəmir mayalandıqda 3 böyük kündəyə bölüb yayın, hər kündənin ortasına içlikdən qoyub xəmiri bükün, büküş altda qalmaq şərti ilə xəmiri yenə bir az yayın.

Sobanın qabını yağlayıb kətələri yığın və üzərini örtüb 15-20 dəqiqə saxlayın.

Sonra üzərinə yumurta sürtüb çəngəl ilə naxış vurun.

Sobada 180 dərəcə temperaturda 25-30 dəqiqə bişirin.

Nuş olsun!

lovely-culinary.com