Azərbaycan Respublikasının Prezidenti İlham Əliyevin imzaladığı sərəncama əsasən, 2021-ci il ölkəmizdə “Nizami Gəncəvi ili” elan olunub.

Bakı Şəhər Mədəniyyət Baş İdarəsinin Yasamal rayon Mərkəzləşdirilmiş Kitabxana Sisteminin 1 nömrəli filialının əməkdaşı Səidə Rəcəbova dahi şair, qüdrətli söz sahibi  Nizami Gəncəvinin  yaradıcılığında xüsusi yer tutan qadın obrazları haqqında məlumatı sosial şəbəkələrə təqdim edir.  

Kitabxanaçının  səsləndirdiyi məlumatda  Nizaminin  qadın surətlərinin zəriflik və incəlik əks etdirən tərəfləri deyil,  onların ağıl və hünəri, hökmdarlıq məharətləri, müdrik və uzaqgörən düşüncə tərzi qabarıq şəkildə diqqətə çatdırılıb.

Qeyd edək ki, Nizami Gəncəvinin ədəbiyyatımıza gətirdiyi neçə-neçə yenilikçi ənənələr sırasında ən çox diqqətçəkən və  böyük hünər hesab edilən  məhz qadın obrazları olub. Şairin özünəməxsus  ustalıqla yaratdığı qadın obraz və xarakterləri o zamankı ədəbi inkişafda intibah hadisəsi, yenilik və birincilik sayılır.

Nizami Gəncəvinin nadir qələmi və dünyagörüşü ilə sənətdə, söz meydanında  üsyan edən, ədəb, mərifət və ədalətlə taxt sahibi olan Şirin, Məhinbanu, Nüşabə kimi hökmdar qadınlar, Fitnə kimi nəsihət etməyə qadir qadın obrazları görünməyə başlayıb.

Eyni zamanda, videoçarxda Nizaminin qiymətli söz xəzinəsində “Xəmsə” adlanan ”Sirlər xəzinəsi”, ”Xosrov və Şirin”, “Leyli və Məcnun”,  “Yeddi gözəl”, “İsgəndərnamə” kimi beş məşhur poemadan ən yaddaqalan qadın obrazlarının  Şirin, Məhinbanu Nüşabə və Fitnənin adları sadalanıb.

Hazırlanmış videoçarxda şairin həyat  və yaradıcılıq fəaliyyətinə aid olan şəkilləri, əsərləri, kitabları, müdrik kəlamları, heykəli, adına kəsilmiş pul və poçt markalarının fotoları da yer alıb.

Videoçarx bəstəkar Soltan Hacıbəyovun “Karvan” kompozisiyası ilə müşayiət olunub və aşağıdakı keçiddə verilib:

https://www.instagram.com/tv/COHY_90B_a2/?igshid=21xwckq9bd0y