XƏBƏRLƏR
MƏLUMAT
"El bilir ki, sən mənimsən" adlı hesabat konserti keçirilib
ÜMÜMİ XƏBƏRLƏR
21/06/2023 05:08

Bakı Şəhər Mədəniyyət Baş İdarəsinin və Naxçıvan Muxtar Respublikası Mədəniyyət Nazirliyinin birgə təşkilatçılığı ilə Bakı şəhər 5 nömrəli Uşaq İncəsənət Məktəbi Naxçıvan şəhər Gənclik Mərkəzində Ümummilli lider Heydər Əliyevin anadan olmasının 100 illik yubileyinə həsr olunan "El bilir ki, sən mənimsən" adlı hesabat konserti keçirilib.

İlk öncə rəssamlıq şöbəsinin istedadlı şagirdlərinin Ulu Öndərə, Vətən müharibəsinə, şanlı Zəfərimizə, tarix və mədəniyyət abidələrinə həsr edilən əsərləri, o cümlədən müxtəlif əl işləri sərgilənib.

Konsertdə Ümummilli liderin həyatı və fəaliyyəti haqqında ətraflı məlumat verilib.

“Qələbə” mahnısı ilə başlayan konsert tamaşaçılarda əsl qələbə ovqatı yaradıb. Konsertdə Fikrət Əmirov, Niyazi, Qara Qarayev və digər görkəmli bəstəkarlarımızla yanaşı, bir sıra dünya klassiklərinin əsərləri, maraqlı kompozisiyalar, marşlar ifa edilib.

Respublika və beynəlxalq müsabiqələr laureatı olan şagirdlərin ifaları tamaşaçılar tərəfindən alqışlarla qarşılanıb. Konsert “Qələbəyə gedən yollar” əsəri ilə başa çatıb.

Daha sonra Heydər Əliyev Muzeyi ziyarət edilib.

Baxış sayı: 1582