Vaqif Firudin oğlu Əsədov 5 aprel 1947-ci ildə Naxçıvan Muxtar Respublikasında anadan olub. 1969-cu il may ayının 25-də Azərbaycan Dövlət İncəsənət İnstitutunun (indi ki, Azərbaycan Dövlət Mədəniyyət və İncəsənət Universiteti) “Dram və kino aktyorluğu” fakültəsini bitirib.

1969-cu ildən 1989-cu ilə kimi Cəlil Məmmədquluzadə adına Naxçıvan Dövlət Musiqili Dram Teatrında aktyor, quruluşçu rejissor, baş rejissor vəzifələrində çalışıb. 1982–1989-cu illərdə Naxçıvan şəhərində fəaliyyət göstərmiş “Cavid” Poeziya Teatrının yaradılmasına nail olub. Teatr səhnəsində oynanılan üç tamaşadan sonra o vaxt üçün çox böyük hesab olunan Lenin Komsomolu mükafatı laureatı adına layiq görülüb. V. Əsədov hələ aktyor kimi işləyərkən yadda qalan bir çox obrazları olub.

Onun Naxçıvan Dövlət Musiqili Dram Teatrında Ə. Əylislinin  “Mənim nəğməkar bibim”, “Qiymətli qafiyələr”, “Bir cüt bədmüşk ağacı”, Həmid Arzulunun “Əlincə qalası”, Yucin Onilin “Qarağaclar altında məhəbbət”, Sofoklun “Elektra”, Paolo Messininin “Sükut divarı”, Vaqif Səmədoğlunun “Bəxt üzüyü” tamaşalarına quruluş verib.

V.Əsədov 1989-cu ildən Azərbaycan Dövlət Gənc Tamaşaçılar teatrında quruluşçu rejissor kimi fəaliyyət göstərib. Onun bu teatrda hazırladığı İ. Coşğunun “Açıl, bənövşəm açıl”, “Ana laylası”, A.Həsənzadənin “Mağara”, “Oxu bülbül”, İ.Əfəndiyevin “Məhv olmuş gündəliklər”, F.Mustafanın “Adsız”, Ç.Dikkensin “Oliver Tvistin macəraları”,  S.S.Axundov, A.Şaiqin “Qaraca qız”, Y. Abramov, L.Bəyimin “Yarımçıq qalmış”,  C.Cabbarlının “Oqtay Eloğlu” kimi əsərləri gənclərin sevdiyi tamaşalara çevrilib.

Rejissor həmçinin Akademik Milli Dram Teatrının səhnəsində “Burlaxatun” (N. Xəzri) və İrəvan Dövlət Dram Teatrın səhnəsində “Məhəbbət yaşayır hələ” (Hidayət), Azərbaycan Dövlət Akademik Musiqili Teatrı səhnəsində “Qar çiçəyi” (Y. Abramov, L. Bəyim) tamaşalarına quruluş verib.

V.Əsədovun yaradıcılığı yalnız teatr tamaşaları hazırlamaqla məhdudlaşmayıb. O, eyni zamanda bir sıra iri miqyaslı Dövlət səviyyəli tədbirlərin quruluşçu rejissoru və ssenari müəllifi olub. Belə tədbirlərə misal olaraq,C. Məmmədquluzadənin 120 illiyi, C. Məmmədquluzadənin 150 illiyi, H. Cavidin 120 illiyi, Zərifə Əliyevanın 80 illiyi, Heydər Əliyevin 80 illiyi, S. Vurğunun 100 illiyi, Həsən Turabovun 80 illiyi , “Yeni teatr” gənc rejissorların ümumrespublika festivalının açılış və bağlanış mərasimlərini, Gənclər Festivalı çərçivəsində “Tarixin canlı səhifələri”ni qeyd etmək olar.

Filmoqrafiyası: “Ac həriflər” (tammetrajlı film-tamaşa1993), “Qayalarda qalan səs” (film, 1995), “Yük” (film, 1995), “Fatehlərin divanı” (film, 1997), “Ömürdən uzun gecə” (film, 1996), “Yaz yuxusunun işığı” (film, 1996), “Şeirin xəzrisi” (film, 2000), “Arzuların ardınca...” (film, 2015), “Sən demə” (film, 2020).

O, I Nəsimi – şeir, incəsənət və mənəviyyat festivalı çərçivəsində “İmmolatio” (“Qurbanvermə”) tamaşasına, II Nəsimi – şeir, incəsənət və mənəviyyat festivalı çərçivəsində “LEYLA. FONS VITAE” poeziya tamaşasına quruluş verib.

V.Əsədov 1978-ci ildə “Azərbaycan SSR əməkdar artisti”, 2006-cı ildə “Azərbaycan Respublikasının xalq artisti” fəxri adlarına, 1986-cı ildə “Şərəf nişanı” ordeninə, 2002–2004-cü illərdə Prezident mükafatına, 2006-cı ildən Azərbaycan Respublikası Prezidentinin təqaüdünə, 2018-ci ildə Azərbaycan Respublikası Prezidentinin fəxri diplomuna layiq görülüb.

V.Əsədov 19 may 2022-ci ildə vəfat edib.