Fazil Mehdiyev 20 avqust 1966-cı ildə Laçın rayonunun Ələkçi kəndində anadan olub. O, körpə olarkən ailəsi Ağdamın Abdal Gülablı kəndinə köçüb. 1983- cü ildə məktəbi  bitirdikdən sonra hərbi xidmətə gedib.

Qarabağda baş verən hadisələrdən  narahat olan Fazil Mehdiyev 1990- cı ildə Ağdam rayon Daxili İşlər Şöbəsində yaradılmış polis batalyonuna yazılır. Çox keçmir onun səsi ən qaynar döyüş meydanlarından eşidilir. 1991- ci ildə Qaradağlı kəndində ağır yaralanan Fazil sağalan kimi cəbhəyə qayıdır. O, 1991- ci ilin avqust ayında erməni işğalçılarına məxsus "Niva" markalı avtomobili ələ keçirərək polis idarəsinə təhvil verib.

1991- ci il sentyabrın 23- dən 24- ə keçən gecə ermənilərin Abdal Gülablı (Gülablı) kəndinə hücumu zamanı  Fazil dostu Salehlə ermənilərin  atəşinə tuş gəlir və bu döyüşdə faciəli surətdə həlak olur.

 Şəhid Ağdam rayonunun "Qarağacı" qəbristanlığında dəfn edilib.

Azərbaycan Respublikası Prezidentinin 8 oktyabr 1992- ci il tarixli 264 saylı fərmanı ilə Mehdiyev Fazil Umud oğluna ölümündən sonra Azərbaycanın Milli Qəhrəmanı adı verilib.

Bakının Nəsimi rayonunda büstü qoyulub, Səbail rayonunda isə adına küçə var.

Bakı şəhərinin mərkəzində Xətai prospekti 136 ünvanında milli qəhrəman Fazil Mehdiyevin şərəfinə kiçik park salınıb və parkın mərkəzində  büstü qoyulub.