Oslodakı Kulturkirkendə (Yakob mədəniyyəti kilsəsi) tanınmış norveçli pianoçu Tord Qustavsenin təşkilatçılığı ilə “Pinsefestival for Meditativ Musikk” adlı beşinci meditativ musiqi festivalı keçirilib.

AZƏRTAC xəbər verir ki, festival çərçivəsində təşkil olunan “Heart Awakening” (”Ürəyin oyanışı”) adlı konsert axşamında azərbaycanlı xanəndə, Azərbaycanın Xalq artisti Alim Qasımov və Əməkdar artist, caz musiqiçisi və saksofonçu Rain Sultanov iştirak ediblər.

Azərbaycan musiqiçiləri pianoçu Tord Qustavsen, alman violonçelçisi Ana Lexner, norveçli perkussionçu Kennet Ekorns və truba ifaçısı Nils Petter Molver ilə birlikdə əvvəlcədən hazırlanan repertuar olmadan birbaşa səhnədə yaranan meditativ musiqi ifa ediblər.

Norveçli musiqi tənqidçisi Tor Hammerye “Nettavisen” nəşrində yazır: “Bu, həm şəxsi, həm də yaradıcı kontekstdə altı musiqiçinin ilk görüşü idi. Məşqlər? Tanış əsərlər? Onların heç biri yox idi. Ancaq qısa bir səs yoxlaması və dərhal əsl sehrin yaradıldığı, bədəndə, ruhda, ən əsası, ürəkdə əbədi qalacaq bir təəssüratın yarandığı bir konsert oldu”.

Tənqidçi onu da qeyd edir ki, Alim Qasımovun gücü, energetikası və şəxsiyyəti unikaldır: “O, insan, həyat, sevgi və ağrı-acı haqqında oxudu. Mən bunu hətta bir söz belə başa düşmədən hiss etdim. Onun həmvətəni, saksofonçu Rain Sultanov musiqini heyrətamiz hisslərlə ifa etdi”.

Azərbaycanlı artistlərin çıxışları sürəkli alqışlarla qarşılanıb.

Qeyd edək ki, Alim Qasımov və Rain Sultanov Oslodakı Azərbaycan Evinə də baş çəkiblər.

Azərbaycan Evinin sədri Ramil Əliyev qonaqlara həyata keçirilən layihələr və Norveçdəki Azərbaycan icmasının fəaliyyəti barədə məlumat verib. Artistlər Azərbaycan Evinin divarları arasında təşkil olunmuş milli muğama həsr edilən sərgi ilə tanış olub, xalqımızın musiqi ənənəsinin xaricdə təbliğini yüksək qiymətləndiriblər.

Qonaqlar Azərbaycan Evinə muğam və caz əsərlərindən ibarət CD-diskləri hədiyyə ediblər. Səfər zamanı, həmçinin Azərbaycan diasporunun nümayəndələri ilə səmimi görüş keçirilib, onların mədəniyyət və muğamla bağlı sualları cavablandırılıb. Alim Qasımov və Rain Sultanov Azərbaycan Evinin “Qonaqlar kitabı”na öz səmimi arzularını yazıblar.

Alim Qasımov Nizami Gəncəvi adına Azərbaycan bazar günü məktəbində məşğələyə də qatılıb. Xalq artisti tələbələrlə böyük maraqla söhbət edib, onlarla birlikdə şeirlər oxuyub.

Tədbirin sonunda məktəblilər və onların valideynləri ilə xatirə şəkilləri çəkdirilib.