Azərbaycan bəstəkarlıq məktəbinin görkəmli nümayəndələrindən biri də Fərhəng Rəhim oğlu Hüseynovdur. Bəstəkar, skripkaçı, Azərbaycanın Əməkdar artisti (2009), "Böyük İpək Yolu" Beynəlxalq Müsabiqəsinin (Yaponiya, 1991), "Sülh naminə" Beynəlxalq Müsabiqəsinin (ABŞ, 1995), "Xose Asunsyon Flores" adına I Beynəlxalq Müsabiqənin (Argentina, 2000) laureatı, gözəl insan, millətinin başını uca edən fədakar sənətkar Fərhəng Hüseynov 1949-cu ilin iyulunda dünyaya göz açıb.

Alim atanın duyğularına qanad verən amillərdən biri Fərhəngdə uşaqlıqdan özünü büruzə verən Qarabağ ellərinə məxsus əsrarəngiz musiqili yaşam intonasiyası idi. Fərhəng 1968-ci ildə Bülbül adına Orta İxtisas Musiqi Məktəbinin skripka sinfini bitirib və Ü.Hacıbəyli adına Azərbaycan Dövlət Konservatoriyasının bəstəkarlıq fakültəsinə daxil olub. Azərbaycan bəstəkarlıq məktəbinin dahisi Qara Qarayev Fərhəngin sənət müəllimi, Fərəc Qarayev isə ixtisas müəllimi kimi gənc istedadın yetişməsində, püxtələşməsində əllərindən gələni əsirgəmirlər. 3-cü kursda oxuyanda məhz Qara Qarayevin məsləhəti və xeyir-duası ilə Fərhəng P.İ.Çaykovski adına Moskva Dövlət Konservatoriyasına köçürülüb və təhsilini bu dünya şöhrətli musiqi ocağında davam etdirib. F.Hüseynov ona göstərilən etimadı doğruldub, Avropa musiqisinin incəliklərini dərindən mənimsəyib. Artıq tələbəlik illərindən layiq olduğu şöhrət onun qapısını döyür. Xarici ölkələrə qastrol səfərlərinə göndərilir, müsabiqələrdə iştirak edir. 4-cü kursda olanda Qərbi Berlində keçirilən Gerberin fon Karayan adına müsabiqədə Moskva Konservatoriyası orkestrinin heyətində etdiyi çıxışa görə qızıl medala layiq görülüb. 1975-ci ildə Fərhəng konservatoriyanı skripka və bəstəkarlıq olmaqla iki ixtisas üzrə uğurla başa vurub. Əsgəri xidmətini hərbi hissənin orkestrində keçib.

Hərbi borcunu ödəyib, artıq Bakıya yüksək ixtisaslı musiqi müəllimi kimi qayıdıb, Konservatoriyada dərs deyib. Lakin yaradıcılıq yolunu da davam etdirib. Skripkada ifa etməklə yanaşı, onu narahat edən hadisələrin musiqi poetikasını axtarıb. Düşdüyü aləmin sehrini dərindən mənimsəmək üçün yenidən Moskvaya gedib assistent-stajor qismində aspirantura təhsili almağa ehtiyac duyub. Bundan sonra isə yaradıcılıq istiqamətini rels üzərinə keçirərək sürətlə sənətin zirvələrinə doğru yol alıb.

UNESCO-nun təşəbbüsü ilə 1991-ci ildə Yaponiyanın "Asaxi" televiziya şirkətinin hamiliyi altında Tokioda keçirilən dünya bəstəkarlarının "Böyük İpək Yolu" festivalında özünü sınamaq qərarına gələn Fərhəng Hüseynov 178 əsər içərisində "Böyük Çöl", "Hərb və Sülh", "Böyük Elçilik", "Oyunlar", "Ay Yolu" əsərlərindən ibarət “Zaman üzrə səyahət" adlı beşhissəli konserti ilə iştirak edib. Həmin əsərlərin sırasından beynəlxalq səviyyəli münsiflər heyəti tərəfindən cəmi 10 əsər seçilib finala tövsiyə edilir və... onlardan beş əsər qalib elan olunub. Azərbaycanlı bəstəkarın adı qaliblər sırasında 3-cü yerdə çəkilib və musiqi korifeyləri bəstəkarın konsertini "festivalın əsas orijinal musiqi kompozisiyasında parlaq surətdə təcəssüm etdirilmiş" kimi qiymətləndiriblər. Çoxprofilli beynəlmiləl milli koloriti - Azərbaycan, Avropa, Çin, yapon musiqisinin melodik, ritmik, tembr cizgilərini bir məcraya gətirməyi bacaran istedadlı bəstəkar vahid bir musiqi mənzərəsi yaratmaqla dinləyicilərə ümumbəşəri hisslər aşılamağa uğurla nail olub.

Fərhəng Hüseynovun zirvəyə doğru yolu kodlaşma dövrü Yaponiyadakı qələbəsilə başlayıb. Həmin andan etibarən uğur özü onun yanına uçub və yeni qələbələrə doğru aparıb.

Müsabiqə günlərində Fərhəngin konsertinə tamaşa edib bəyənən, bəstəkarla yaxından tanış olan məşhur musiqiçi və iş adamı xanım Eyko Aoiki həmyerlimizə yapon mövzusunda opera yazmağı təklif edib və qəhrəman yapon dənizçilərinin həyatından bəhs edən senarisini ona təqdim edib.

Üçillik gərgin zəhmətdən sonra "Kodayu" adlı əsər tamamlanıb və "Asaxi" televiziya şirkətinin 35 illiyinə həsr olunmuş ilk tamaşa 1993-cü ildə Tokionun Bunkamura Orçard zalında, sonra isə Osaka və Sudzika şəhərlərində böyük uğurla keçib, televiziya ilə birbaşa yayımlanaraq kompakt-diskə yazılıb. Yapon şahzadəsi operanı Yaponiyanın ilk "Romeo və Cülyetta"sı adlandırıb. İlk milli yapon operası "Kodayu" yüz iyirmi milyonluq yapon xalqının musiqi tarixinə beləcə daxil olub və hər iki ölkənin mədəniyyət tarixinə unudulmaz səhifələr yazaraq Azərbaycan-Yaponiya mədəni əlaqələrinin təməlini qoyub.

1992-ci ildən Türkiyədə yaşayan istedadlı bəstəkar və musiqişünas Ədənə şəhərindəki Çuxuroba Universitetində gənc bəstəkarlara musiqi dünyasının sirlərini öyrətməklə yanaşı müxtəlif konsertlərdə, sənət görüşlərində, beynəlxalq müsabiqələrdə iştirak edib, musiqiçilər arasında solist, kvartet, orkestr ifaçısı kimi tanınıb. Bir çox ölkələrin teatrlarından ona opera və ya balet kimi irihəcmli musiqi əsərləri yazmaq üçün sifarişlər verilib.

Mersin Opera və Balet Teatrı Fərhəng Hüseynova "Aba kraliçası" adlı balet yazmağı təklif edib. Antik dövrə aid baletin əsas mövzusu məhəbbət və Xeyirlə Şərin mübarizəsidir. Libretto ürəyini fəth etdiyindən, o, gərgin işləyərək qısa müddətdə əsəri tamamlayıb. Balet libretto müəllifi Altay Bayramın və xoreoqraf Şamil Terequlovun iştirakı ilə Mersin Dövlət Opera və Balet Teatrının səhnəsində böyük müvəffəqiyyətlə göstərilib. "Aba kraliçası" antik süjetinə görə ilk türk baleti kimi Mersin Teatrının fəxri hesab olunub və Mərmərə festivalında 2005-2006-cı illər teatr mövsümünün ən yaxşı səhnə əsəri kimi qəbul edilib.

Fərhəng Hüseynovun yaradıcılıq üslubu yeddi rənglə yeddi səsin uzlaşan çalarından yaranmış harmoniyadır. Onun simfoniya, kantata, oratoriya, opera, balet əsərləri, kino musiqisi, həmçinin kiçik formalı bir çox kamera əsərləri, skripka, fortepiano, orqan üçün sonatalar, simli kvartet, skripka üçün pyeslər, mahnılar kimi müxtəlif janrlarda əsərləri musiqi xəzinəmizin incilərindəndir. 1995-ci ildə Nyu-York şəhərində "Dünyaya Sülh Naminə Barış Cəmiyyəti"nin beynəlxalq müsabiqəsində münsiflər Cəmiyyətin xüsusi "Zirvə" mükafatını yekdilliklə görkəmli Azərbaycan bəstəkarı Fərhəng Hüseynovun "Yer üzündə sülhə nail olunmalıdır" oratoriyasına verib.

Fərhəng Hüseynov yaradıcılığının müdrik və məhsuldar çağında əbədiyyətə qovuşub. 2010-cu il fevralın 16-da onun ürəyi dayanıb.

Novruz Novruzov