Bakı Şəhər Mədəniyyət Baş İdarəsi Qaradağ rayon Mərkəzləşdirilmiş Kitabxana Sisteminin 5 nömrəli filialı oxuculara Azərbaycanın Xalq rəssamı Tofiq Ağababayevin sənət əsərlərindən ibarət videoçarx təqdim edib.

Tofiq Ağababayev 8 sentyabr 1928-ci ildə Bakıda anadan olub. 1946-1951-ci illərdə Əzim Əzimzadə adına Rəssamlıq Məktəbində təhsil alıb. O, 1953-1959-cu illərdə Baron Ştiqlits adına Rəssamlıq Akademiyasının (keçmiş V.Muxina adına ali-sənaye rəssamlıq məktəbi) keramika – şüşə fakültəsində təhsilini davam etdirib.

Həmin illərdə yaradıcılığa başlayan rəssam dekorativ, monumental rəngkarlıq janrlarında fərqli əsərlər yaradıb. Rəssam 1960-ci illərdə keramika sənəti üzrə bir sıra əsərlər işləyib. Onun “Azərbaycan lirikası” adlı keramik triptixi (Dövlət Statistika Komitəsinin, Memarlıq və İnşaat Universitetinin idman salonunda mozaika işləri) ilk yaradıcılıq nümunələrindəndir.

Tofiq Ağababayev əsərlərində milli kolorit, əsl azərbaycanlı ruhu duyulan bir rəssamdır. Novruzun gəlişini əks etdirən “Bahar” mozaik lövhəsi buna sübutdur. Tofiq Ağababayev Bakı Dövlət Sirkinin interyerini bəzəyən “Azərbaycan sirki” mozaik lövhəsini yaradıb. Bundan başqa “Abşeron qoruğu”, ”Bakı nefti cəbhəyə”, ”Meşəbəyi”, “Torpağın nəfəsi”, “May”, “1945-ci il, Bakı” və s. kimi əsərlərin müəllifidir.

Tofiq Ağababayev dəzgah rəngkarlığı və qrafika janrlarında da əsərlər yaradıb.

Tofiq Ağababayev 1966-cı ildə Bakı şəhərinin ilk baş rəssamı vəzifəsində çalışıb. Bakı Soveti binasının üzərindəki gerbin bərpası, bəzi heykəllərin yerləşdirilməsi, şəhərimizin simvolik açarının düzəldilməsi və s. işlər onun adı ilə bağlıdır.

Rəssamın tarixi janrında olan portretləri arasında “Məhəmməd Füzuli” (1996) və “Şah İsmayıl Xətai” (2000) əsərlərinin adını çəkmək olar. Onun çəkdiyi “Sofi Həmid” (2000) və “Allahu-əkbər” (2001), “Nardaran piri” lövhələrində dini dəyərlərin tarixiləşən məqamlarına bədii görüntü verilib. Rəssamın işləri rəng cəhətdən çox millidir. Belə əsərlərdən “Ümid rəngləri”, “Sözsüz”, “Yaz mahnısı”, “Şərq motivi”, “Yaz nəfəsi” kimi əsərlərin qeyd edə bilərik.

Rəssamın fərdi sərgiləri V.Səmədova adına sərgi salonunda (1994), “BakıMədəniyyət” sərgi salonunda (1996), Azərbaycan Dövlət Mədəniyyət və İncəsənət Universitetinin sərgi salonunda (1977), eləcədə Moskvada (2002) keçirilib.

Ustad sənətkar 2006-cı ildə isə “Azərbaycan Respublikasının Xalq rəssamı”fəxri adına layiq görülüb.

Mövzu ilə bağlı videoçarxı aşağıdakı keçidlərdən izləyə bilərsiniz:

https://www.instagram.com/p/CE3BsZ2Bdry/?igshid=120tant9ygx31

https://www.instagram.com/p/CE2X1YABzl9/?igshid=1axadqizm12cz

https://m.facebook.com/story.php?story_fbid=132896365182866&id=100053875086603