Dekabrın 24-də Bakı Dövlət Universitetinin İnformasiya və sənəd menecmenti fakültəsinin müəllim və tələbə heyəti görkəmli kitabşünas alim-pedaqoq, şair-publisist Knyaz Aslanın anadan olmasının 65 illik yubileyi münasibətilə “Şair - publisist, kitabşünas alim Knyaz Aslan - 65” adlı virtual və “Kitabşünas alim Knyaz Aslan - 65” mövzusunda açılan ənənəvi kitab sərgisi ilə tanış olmaq üçün Milli Kitabxanada olublar.

Bu barədə AZƏRTAC-a Milli Kitabxanadan məlumat verilib.

Milli Kitabxananın direktor müavini Ədibə İsmayılova, universitetinin İnformasiya və sənəd menecmenti fakültəsinin dekan müavini Zahidə Rzayeva, kafedra müdiri, dosent Elçin Əhmədov, kafedra müdiri, dosent Sevda Xələfova, fakültənin əməkdaşları və tələbələr alimin yaradıcılıq fəaliyyəti haqqında danışıb, ürək sözlərini söyləyiblər.

Sərgilərdə şair-jurnalist, alim Knyaz Aslanın Azərbaycanda təhsilin və elmin inkişafındakı xidmətlərinə görə layiq görüldüyü mükafatlar, monoqrafiyaları, dərslik və dərs vəsaitləri, şeirləri dövri mətbuat səhifələrində çıxan çoxsaylı elmi-nəzəri, ədəbi-publisistik məqalələri, “Ön söz”ün müəllifi, layihə rəhbəri, tərtibçi, rəyçi və redaktoru olduğu kitablar, təsisçisi və baş redaktoru olduğu “Kitabşünaslıq və redaktor sənəti” jurnalının nömrələri nümayiş olunur.

Kitabşünas alim Knyaz Aslan Milli Kitabxananın kollektivinə təqdim olunan sərgilər üçün minnətdarlığını bildirib.