Bakı Şəhər Mədəniyyət Baş İdarəsi Sabunçu rayon Mərkəzləşdirilmiş Kitabxana Sisteminin 2 nömrəli filialı Xalq artisti Yaşar Nurinin anadan olmasının  70 illiyi ilə əlaqədar "Həmişəyaşar Yaşar Nuri" adlı videoçarx hazırlayıb.

Bu gün Xalq artisti, tanınmış aktyor Yaşar Nurinin doğum günüdür.

İncəsənətin ayrı-ayrı sahələri ilə məşğul olan insanlar öz millətinin, xalqının milli-mənəvi sərvətini inkişaf etdirməklə yanaşı, eyni zamanda, onu dünyaya tanıdırlar. Vaxtilə böyük ingilis ədibi Vilyam Şekspir bildirib ki, həyat bir səhnədir, bizlərsə aktyoruq, hərə öz rolunu bir şəkildə səhnədə canlandırır. Vilyam Şekspirin bu bənzətməsi ilə razılaşsaq, onu da qeyd etmək lazım gəlir ki, bəziləri bu “həyat səhnəsi”ni vaxtından əvvəl tərk edir. Elə insanlar da var ki, həyatda elə aktyor olaraq rol oynayır. Belə görkəmli insanlardan biri də sevimli sənətkarımız, görkəmli aktyor, hər bir azərbaycanlının sevimlisi Yaşar Nuridir...

Bu gün böyük sənətkarımızın anadan olmasından 70 il ötür.

Özünəməxsus milli koloriti ilə seçilən, lirik, komik, psixoloji və dramatik rolların məharətli ifaçısı, hamımızın sevimlisi Yaşar Nuri 1951-ci il sentyabrın 3-də  Bakıda aktyor ailəsində dünyaya göz açıb. Aktyorun atası Məmmədsadıq Nuriyev Azərbaycan kino və teatr tarixində çoxsaylı rolların mahir ifaçısı olub.  Özünün qeyd etdiyi kimi "Sənətə gəlməyimdə, aktyor olmağımda şübhəsiz ki, atamın rolu böyükdür. Çox güman ki, o, aktyor olmasa idı mən də bu sənətə bağlanmazdım '...

Yaşar Nuri hələ kiçik yaşlarında ikən səhnədə rol alıb. İlk dəfə on bir yaşı olarkən “Toy kimindir?” tamaşasında Tapdıq rolu ilə səhnəyə gələn unudulmaz aktyorumuz televiziyada “Yelkən” verilişinin aparıcısı olub, “Buratino”, “Qaranquş”, “Pioner” uşaq verilişlərində iştirak edib.

Yaşar Nuri yaddaqalan obrazları ilə həmişə xalqımızın ürəyində yaşayacaq. Təkrarsız və bənzərsiz istedada malik bu sənətkar özünəməxsus lirik koloritlə tamaşaçıların rəğbətini qazanıb və istənilən azərbaycanlının sevimli aktyoruna çevrilib. 

Belə bir məşhur fikir var: “Dünya bir pəncərədir, hər gələn baxar gedər...” Həqiqətən də, belədir, lakin kimlərsə bu pəncərədən çox baxır, kimlərinsə ömür payına “pəncərədən” az müddət baxmaq nəsib olur... Yaşar Nuri də bu “həyat pəncərəsindən” az müddət baxa bilib. 

Ancaq bu gün böyük sənətkarımızın əziz xatirəsi yaratdığı obrazlarla yad edilir və hər zaman ürəklərdə yaşayır. 

Yaşar Nuri böyük sənətkardır, təkrarsız teatr, kino adamıdır.  Özünəməxsus səhnə mədəniyyəti və davranışı, improvizə qabiliyyəti, yaradıcılıq istedadı, obrazlara məxsusi yanaşma tərzi onu bir çox aktyor həmkarlarından fərqləndirib. 

Xalq artisti Yaşar Nuri uzun sürən xəstəlikdən sonra 2012-ci il noyabr ayının 22-də dünyasını dəyişib.

Hamımızın çox sevdiyimiz, gülüşünə, aktyorluğuna heyran olduğumuz Yaşar Nuridən bir də olmayacaq! 

...Yaşar Nurinin ömür payına cəmi 61 il yaşamaq düşüb. İllər keçəcək,  özünəməxsus ustalıqla, şirinlikə yaratdığı obrazlarla bu böyük sənətkar həmişə yad ediləcək və hər zaman onun əziz xatirəsi unudulmayacaq,  xalqımızın, onu sevənlərin ürəyində yaşayacaqdır.

Videoçarxı aşağıdakı keçiddən izləyə bilərsiniz:

https://facebook.com/profile.php?ref=homescreenbrowser#

https://www.instagram.com/tv/CTUC96CD-KO/?utm_medium=copy_link