Artur Şopenhauer 1788-ci il 22 fevralda Polşanın Qdansk şəhərində anadan olub. Bankir olan atası o uşaqkən vəfat edib. Şopenhauer anası ilə birlikdə Veymar şəhərinə köçüb, təhsilini bu şəhərdə tamamlayıb.

Uzun illər Berlin Universitetində müəllim vəzifəsində çalışıb, 1831-ci ildə Frankfurta gedərək ciddi elmi fəaliyyətlə məşğul olub.

Çox çalışqan və enerjili bir insan olan Şopenhauer, pessimist filosoflardandır. Bütün fəlsəfəsini dizayn və iradə üzərində qurub. Onun baxışlarına görə dünya ancaq zəka ilə dərk edilə bilər.

Daha çox 1844-cü ildə yayımladığı "Die Welt als Wille und Vorstelung" (Dünya iradə və təsəvvür kimi) əsəri ilə tanınıb. "Eristik dialektika" əsəri isə daha öncələr 1831-ci ildə yayımlanıb. Şopenhauer bu əsərində mübahisə və müzakirə vaxtı istifadə olunan boş sözlərin,yersiz arqumentlərin iç üzünü onları müdafiə edən tərzdə açıb, sarkastik bir şəkildə oxucuya təqdim edib. Əsər orijinal dildə "kunstgriffe" olaraq göstərilən hiylələrdən ibarətdir. "Eristik dialektika" mübahisədə haqlı çıxmaq sənətidir, həqiqəti tapmaq sənəti deyil.

Əziz oxucular, bu gün sizə dahi filosof Artur Şopenhauerin müdrik kəlamlarını təqdim edirik.

Acıma - bütün əxlaqın əsasıdır.

Başqalarının bizim dəyərlərimiz haqqında fikirləri şərəfdir və bu obyektiv sayılır. Subyektiv isə bizim bu fikirlər qarşısında qorxumuzdur.

Cavanlıqda fəhm, qocalıqda – düşüncə üstünlük təşkil edir: buna görə də birincisi poeziya, ikincisi fəlsəfə üçün əlverişlidir.

Dahilik canlı xatirələrin mükəmməlliyindən asılı deyilmi? Çünki, həyatın ayrı-ayrı hadisələrini bütöv bir şəkildə bir-birinə bağlayan xatirələrin köməyi ilə adi adamların malik olduqları həyatı daha geniş, daha dərindən dərk etmək olar.

Əxlaqı təbliğ etmək asandır, ona haqq qazandırmaq çətindir.

Fəlsəfə, təsəvvürə gətirilə bilinməyən, bizim özümüzdə gizlənən şeyləri təsəvvürlərdə dərk etmək cəhdidir. Əks təqdirdə, biz yalnız təsəvvür olardıq.

Gənclik nöqteyi-nəzərindən baxsaq, həyat, sonsuz gələcəkdir. Qocalıq nöqteyi-nəzərinə görə isə çox qısa keçmişdir.

Hər ayrılıq ölümün əvvəlcədən dadılması kimidir, yenidən qovuşmaq da yenidən dünyaya gəlməyin əvvəlcədən dadını hiss etmək kimidir.

Xoş xasiyyət, xoşbəxtliyimizə birbaşa təsir edən xüsusiyyətlərdəndir.

İnsanlar öz başlarından çox fövqəlbəşər mənbələrə istinad edənlərə daha çox etibar edirlər.

Kitablar olmasaydı çoxdan ümidsizliyə qapılmışdım.

Qəzetlər tarixin saniyə əqrəbləridir.

Məğrurluq, öz yüksək dəyərində insanın daxili inamıdır. Şöhrətpərəstlik isə sonralar gizli ümidlə özünün mənimsəmək istədiyi inamı başqalarında yaratmaqdır.

Sağlamlıq, bütün başqa xoşbəxtliklərdən üstündür. Sağlam dilənçi xəstə kraldan daha xoşbəxtdir.

Şərəf- daxili vicdan, vicdan isə daxili şərəfdir.

Təbiət insanlar arasında zəka və mənəviyyatda nəhəng fərq qoyur, cəmiyyət isə rütbə və dərəcə yolu ilə həmişə bu fərqi yox etməyə çalışır.

Vərdiş zəncirləri, əvvəl eşidilməyəcək qədər yüngül, sonra qırılmayacaq qədər güclü olur.

Yalqızlıq, bütün görkəmli zəkaların taleyidir.