Larisa Məmmədova 20 Yanvar faciəsinin azyaşlı şəhidlərindən biridir. Azərbaycan Respublikası Prezidentinin 31 mart 1998-ci il tarixli Fərmanı ilə Larisa Məmmədova və digər 146 şəhidə "20 Yanvar Şəhidi" fəxri adı verilib.

Larisa Məmmədova 1977-ci il 11 avqust tarixində Bakı şəhərində anadan olub. Larisanın ailəsi beş nəfərdən ibarəti olub və onun Emil adlı qardaşı, Nərminə adlı bacısı var. 1990-cı il yanvarın 19-dan 20-nə keçən gecə Larisa atası Fərman Məmmədov ilə birlikdə atasının işlədiyi L. Şmidt adına zavoda gedib. L. Şmidt adına zavodun yanında “İkarus” avtobusunda oturduqları yerdə maşın gülləbaran edilib, Larisa ürək nahiyəsindən güllə yarası alaraq, yerindəcə həlak olub. Atası Fərman Məmmədov ağır yaralanıb.

Larisa Məmmədovanın adına Bakı şəhərində küçə yerləşir. Hər il 20 Yanvar ərəfəsində təhsil aldığı məktəbdə Larisa ilə bağlı anım tədbirləri təşkil edilir. Larisanın xatirəsinə həsr olunan yazı, şeir, rəsm müsabiqələri keçirilir. 134 nömrəli məktəbdə onun adını daşıyan şagird təşkilatı fəaliyyət göstərir.

Azərbaycanın Xalq şairi Bəxtiyar Vahabzadə Larisa ilə bağlı “On üç yaşlı körpə bala” şeirini yazıb:

On üç yaşlı körpə bala,

Yazıq anan necə dözsün

Bu kədərə, bu məlala?

Məzarının baş ucunda kuklan da var.

Bu gün layla çalmalıykən sən kuklana,

Kuklan sənə laylay çalar.

Sən özün də kukla idin.

Bu dünyanın əvvəlini, axırını

Heç bilmədin.

Kim kuklaya güllə atar?

Atan oldu…