Özbəkistanın Xarici İşlər Nazirliyi tərəfindən Daşkəndin Tələbələr şəhərciyi parkında təşkil edilmiş “XX Xalqların mədəni ənənələri və mətbəxi” adlı beynəlxalq festivalda ölkəmiz də təmsil olunub. Tədbirdə Azərbaycanla yanaşı, Türkiyə, Qazaxıstan, Əlcəzair, Rusiya, İran, Belarus, Banqladeş, Səudiyyə Ərəbistanı, Cənubi Koreya, Hindistan, Pakistan, Tacikistan və digər ölkələrin Özbəkistandakı səfirlikləri və mədəniyyət mərkəzləri iştirak ediblər.

Tədbirdə Özbəkistandakı Heydər Əliyev adına Azərbaycan Mədəniyyət Mərkəzi tərəfindən milli stendimiz nümayiş olunub.

Mədəniyyət Mərkəzindən AZƏRTAC-a bildirilib ki, Azərbaycan üçün ayrılmış guşədə ölkəmizin bayrağı, Ulu Öndər Heydər Əliyevin həyat yolu və fəaliyyəti, Prezident İlham Əliyevin rəhbərliyi ilə ölkəmizin iqtisadi inkişafından bəhs edən kitablar, Heydər Əliyev Fondu tərəfindən rus və ingilis dillərində çap edilən nəşrlər, Azərbaycanın tarixi və mədəniyyəti, milli mətbəxi ilə bağlı əsərlər nümayiş etdirilib. Festivalda Azərbaycan mədəniyyətinə dair suvenirlər, Qarabağın milli kişi və qadın geyimləri iştirakçılar tərəfindən maraqla qarşılanıb.

Azərbaycan guşəsinə gələnlərə ölkəmizin mədəniyyəti, mətbəxinə dair müxtəlif məzmunlu kitab və jurnallar hədiyyə olunub. Qonaqlara milli mətbəximizin təamları və şirniyyatlarımız təklif edilib.

İştirakçı ölkələrin mahnı və rəqsləri festivala rəng qatıb.

Daha sonra təşkil edilən konsertdə Özbəkistandakı Heydər Əliyev adına Azərbaycan Mədəniyyət Mərkəzinin rəqs ansamblının üzvləri milli rəqslərimizi ifa ediblər.

Festivalda iştirakına görə Azərbaycan stendi xüsusi diploma layiq görülür.

Qeyd edək ki, Beynəlxalq Mətbəx Festivalında satışı təşkil edilən yeməklərdən, suvenirlərdən əldə olunan gəlir ənənəvi olaraq Özbəkistanda fiziki qüsurlu uşaqlar üçün nəzərdə tutulmuş internat məktəblərinə hədiyyə olunub.