Xalqımızın mənəvi dünyasını, gözəllik duyumunu, fitri istedadını, dünyaya fəlsəfi baxışlarını sirli naxışlarda yaşadan Azərbaycan xalça sənətinin qədim tarixi var. Ölkəmizdə min illərdir xalça toxunsa da, xalçaçıların heç vaxt öz peşə bayramlarını qeyd etdiyi gün olmayıb. Artıq altı ildir ki, “Azərxalça” Açıq Səhmdar Cəmiyyətinin yaradıldığı gün mayın 5-i “Xalçaçı Günü” kimi qeyd olunur.

Daim dövlətin diqqət mərkəzində olan, bu qayğı nəticəsində inkişaf edən Azərbaycan xalçaçılıq sənəti və bu sənətin daşıyıcıları məhz bu diqqət nəticəsində təsis edilmiş peşə bayramlarını - “Xalçaçı Günü”nü böyük minnətdarlıq hissi ilə qeyd edirlər.

Ümummilli lider Heydər Əliyevin xalça sənətinə qayğısı nəticəsində Azərbaycanda dünyada birinci Azərbaycan Xalçası və Xalq Tətbiqi Sənəti Muzeyi yaradılıb. “Azərxalça” EİB yeni inkişaf mərhələsinə qədəm qoyub.

Azərbaycan müstəqilliyini yenidən bərpa edəndən sonra isə ümummilli liderin yolunu uğurla davam etdirən Azərbaycan Respublikasının Prezidenti İlham Əliyevin müvafiq sərəncamları ilə “Azərxalça” Açıq Səhmdar Cəmiyyətinin yaradılması, “Xalçaçı Günü” peşə bayramının təsis edilməsi, respublikamızın şəhər və rayonlarında xalça istehsalı emalatxanalarının tikilib istifadəyə verilməsi bu sənəti yaşadanlara göstərilən böyük dövlət qayğısının parlaq təzahürüdür.

Milli mədəniyyətimizin inkişafında böyük rolu olan Birinci vitse-prezident Mehriban xanım Əliyeva da xalçaçılığın yaşadılmasına öz dəyərli töhfələrini verir. Xalçaçıların problemlərinin aradan qaldırılmasında, onların fəaliyyət imkanlarının genişləndirilməsində, nailiyyətlərinin beynəlxalq miqyasda təbliğində Mehriban xanımın xidmətləri misilsizdir. Onun təşəbbüsü ilə Keniyanın Nayrobi şəhərində keçirilən UNESCO-nun Qeyri-Maddi Mədəni İrs üzrə Hökumətlərarası Komitəsinin V sessiyasında Azərbaycan xalçaçılıq sənəti UNESCO-nun Bəşəriyyətin Qeyri-Maddi İrsin nümunələri siyahısına daxil edilib.

Minilliklərin yaşıdı Azərbaycan xalçaçılıq sənətinin ölkə iqtisadiyyatındakı rolunu yüksək dəyərləndirən Prezident İlham Əliyevin diqqət və qayğısı ilə 2016-2020-ci illərdə “Azərxalça” Açıq Səhmdar Cəmiyyətinin 21 filialı yaradılaraq fəaliyyətə başlayıb.

Dövlət başçısının müvafiq Sərəncamı ilə “Azərbaycan Respublikasında xalça sənətinin qorunmasına və inkişaf etdirilməsinə dair 2018-2022-ci illər üçün Dövlət Proqramı”da təsdiq olunub. Dövlət proqramının uğurlu icrası bu sahədə daha böyük nailiyyətlərin qazanılacağından xəbər verir.

“Azərxalça”nın istehsalı olan məhsullar xalçaçı-rəssamlar tərəfindən hazırlanmış çeşnilər əsasında toxunur. Dünyada ilk dəfə olaraq məhz Azərbaycanda qədim və orijinal xalçaların əsasında yeni çeşnilərin elektron variantı hazırlanıb. Dünya muzeylərində və kolleksiyalarda saxlanılan nadir Azərbaycan xalça və xalça məmulatları əsasında çeşnilərin hazırlanmasına daha çox üstünlük verilir.

“Azərxalça”nın filiallarının yerli xammalla təmin edilməsi istiqamətində də mühüm tədbirlər həyata keçirilib. Sumqayıt Kimya Sənaye Parkında Yunəyirici-Boyaq Fabriki açılıb. Burada istehsal ediləcək təmiz yun isə xammal kimi satışa çıxarılacaqdır.

Azərbaycan xalçalarının beynəlaxalq aləmdə tanınması, araşdırılması, təşviqi sahəsində 2010-cu ildə yaradılan “Azərbaycan xalçası ənənəsi” nominasiyasının hazırlanması və UNESCO-nun “Qeyri-Maddi Mədəni İrsin Reprezentativ Siyahısı”na daxil edilməsində Azərbaycan xalçaçıları icması tərəfindən yaradılan və ömrünü Azərbaycan xalça sənətinin tədqiqinə həsr etmiş sənətşünaslıq üzrə elmlər doktoru, professor Röya Tağıyevanın rəhbərlik etdiyi, dekorativ-tətbiqi sənət sahəsində UNESCO-da Azərbaycanı ləyaqətlə təmsil edən yeganə QHT-“Azərbaycan xalçaçıları” İctimai Birliyinin də rolu təkzibedilməzdir. Dövlətin xalça sənətinin yayılmasına yönələn siyasətini dəstəkləyən və maraqlı layihələrlə unudulmaqda olan xalça növlərinin bərpasına, gənclər arasında yayılmasına, hər zaman müasir olan xalça sənətində ənənə ilə yeniliklərin bir araya gətirilməsində göstərdiyi fəaliyyət daim diqqət mərkəzindədir.