Zülfiyyə Güloğlan qızı Xanbabayeva 1967-ci il, 16 oktyabr tarixində Bakı şəhərində anadan olub. 161 nömrəli məktəbi bitirdikdən sonra 1985–ci ildə İncəsənət İnstitutunun "Teatr rejissoru" fakültəsinə daxil olub. 1988-ci ildə "Bakı Payızı-88" müsabiqəsində iştirak edərək finala çıxıb. 1994-cü ildə Zülfiyyə Xanbabayeva Vaqif Gərayzadənin "Aypara" qrupunda çıxış etməyə başlayıb.

Qrupdan ayrıldıqdan bir müddət sonra solo karyerasına başlayıb. 1999–cu ildə ilk klipi – “Demirəm”, 1 il sonra ilk studiya albomu – “Gecə” işıq üzü görüb, eyni ildə ilk solo konserti ilə Respublika Sarayında çıxış edib. 2002 – ci ildə 2 – ci studiya albomu – “Sən Gedən Gündən” təqdim olunub. 2003 – cü ildə “Azərbaycan Respublikasının Əməkdar artisti” adına layiq görülüb. Eyni ildə Azəbaycanda ilk dəfə kinolentə çəkilən “Qəlbinə Yol” klipi və eyni adlı 3–cü studiya albomu işıq üzü görüb. 2004–cü ildə 4–cü studiya albomu - “Sənsiz” işıq üzü görüb. 2005–ci ildə “Canım Məmləkətim” adlı turne layihəsi ilə Azərbaycanın ən böyük inzibati mərkəzlərində konsert proqramı ilə çıxış edib. 2008-ci il 17 sentyabr tarixindən Azərbaycan Respublikası Prezidentinin müvafiq Sərəncamı ilə Xalq artisti adına layiq görülüb. 2009–cu ildə 5–ci studiya albomu – “Dəniz” işıq üzü görüb. 18 klipi, 5 studiya albomu var. Ailəlidir. Bir qız övladı var.

Mükafatları

2000 - Humay mükafatı İlin Ən Yaxşı Proyekti - “Aləm Oyansın”

2001 - Humay mükafatı İlin Ən Yaxşı Klipi - “Sən Gedən Gündən”

2002 - Humay mükafatı İlin Ən Yaxşı Konserti - Heydər Əliyev adına Sarayda solo konsert

2012 - Qrand Müstəqil Milli - İctimai Mükafatı - 2011 Estrada musiqisinə verdiyi əvəzsiz töhfələrinə görə

2012 - Qrand Müstəqil Milli - İctimai Mükafatı - 2011 İlin hit mahnısı - “Unut Getsin”