Bakı Şəhər Mədəniyyət Baş İdarəsinin Yasamal rayon Mərkəzləşdirilmiş Kitabxana Sistemi Mərkəzi Kitabxanasının fəal oxucusu, BDU-nun Hüquq fakultəsinin tələbəsi Nuray Araz kitabxananın qonağı olub.O mütaliənin onun düşüncələrinin formalaşmasına böyük təsir göstərdiyini vurğulayıb.

Gənc həvəskar Nuray Araz mütəmadi olaraq yazılarını kitabxananın əməkdaşları ilə bölüşməyi sevir. O,“Ölümsüzlüyün inam formulu” və “İnam nədir?”adlı yazılarını kitabxananın böyük metodisti İradə Hüseynova və digər əməkdaşları ilə bölüşüb. Əməkdaşlar Nuraya gələcəkdə tanınmış yazar olmasını arzulayıblar.

Ölümsüzlüyün inam formulu

Ölümsüzlük deyəndə ağlımıza ilk gələn heç vaxt ölməmək – həmişə yaşamaq gəlir. Hamımız isə bilirik ki, bu heç vaxt mümkün olmur. Hamı ölür və qara torpağa qarışır. Bəzən “heç kim, heç nə əbədi deyil”- deyirlər. Mən isə bu gün sizə əslində daim əbədi olaraq yaşamağın formulunu verəcəm. Bunun üçün nə İsgəndər kimi zülmətə getmək, nə nağıllardakı kimi sehirli quşun ürəyini yemək, nə də ki kinolardakı kimi sehirli içki içmək lazım deyil. Bunun sirri isə bu həyatda müəyyən dəstxət qoyub getməkdir. Elə bir dəstxət ki, səndən sonra illərlə, əsrlərlə anılasan və unudulmayasan. Məsələn, dahi Nizami XII-XIII əsrlərdə yaşayıb, amma XXI əsrdə belə biz onun yazılarından bəhrələnə bilirik. Bəlkə də deyə bilərsiz ki, biz nə Nizami, nə Füzuli, nə də ki Xətai ola bilmərik. Ya da ki  bizim heç bir istedadımız yoxdur?

 O zaman elə bir həyat yaşamalıyıq ki, sözün əsl mənasında daim xatırlana bilək. İnsan ölsə də, daim əməlləri ilə xatırlanır. Təbii ki çalışın yaxşı əməllər edin ki, yaddaşlarda daim yaxşı qalın. Bu yazını dahi fransız yazıçısı Viktor Hüqonun sözləri ilə bitirmək istəyirəm.

“Ölməkdən sonra yaşamaq istəyirsinizsə, ya oxumağa dəyər şeylər yazın, ya da yazılmağa dəyər şeylər yaşayın.”

İnam nədir?

İnam elə bir hisdir ki, hamının içində var, lakin çox az hissə bunu bilir.  İnam –hədəflərimizə gedən yolun ən böyük dəstəkçisi və ən əsası içimizdə cəm olan hislərin ən vacib olanıdır.  İnam 4 hərf, 2 hecadan ibarət olan dünyanı dəyişdirəcək gücə sahib bir duyğudur. Hər şey inanmaqdan başlar. Əgər bir işi edəcəyimizə inansaq, o işin 50 faizini etmiş olarıq. Ona görə insan edəcəyi hər işə daim inanmalıdır. İnam ən birinci özünə olan güvənlə başlar. Yəni bir insan ilk özünə inanmalıdır. Heç kim bu dünyaya boş-boşuna gəlməyib.  Əgər bu həyatda yaşayırıqsa və yaşayan ölü deyiliksə, mütləq özümüzə inanmalıyıq. Çünki hələ kəşf olunmamış işlər, yeni fikirlər və ideyalar bizi gözləyir . Bizim nə vaxtsa onları kəşf etməyimizi gözləyir.

Bəs niyə getmirik? Niyə dayanmışıq? Bəlkə o potensiala sahibik, amma getmirik. Bəziləri yolun yarısından qayıdır, bəziləri də heçbu  yola daxil olmur. Bilirsinizmi niyə?

Bilmirsinizsə, qoyun mən söyləyim, çünki inanmırıq. Özümüzə inanmırıq. Birdən alınmaz deyə qorxuruq, içimizdəki neqativliyi bir kənara ata bilmirik.Amma bilmirik ki, biz o yolda uduzsaq belə heçnə olmayacaq,əksinə qazanacayıq – bu yolda təcrübə əldə edəcəyik.

 İnam haqqında danışmağa sözlər,cümlələr,səhifələr yetməz. Məncə insan onu var edənə, yəni Tanrıya, daha sonra isə öz varlığına inanmalıdır. O zaman insanın keçə bilməyəcəyi əngəl, açmayacağı qapı və ən əsası qorxmayacağı bir yol olmayacaqdır. Mümkünsüz heç nə yoxdur! Sən yetərki inan! Yetərki inan!