Aygün Səmədzadə 1967-ci il 11 yanvarda Bakıda ziyalı ailəsində dünyaya gəlib. İlk təhsilini Bülbül adına orta ixtisas musiqi məktəbində alıb, 1985-ci ildə məktəbi qızıl medal və fərdi təqaüdlə bitirib. Həmin ildə Azərbaycan Dövlət Konservatoriyasının (indiki Bakı Musiqi Akademiyasının) Tarix-nəzəriyyə fakültəsinə daxil olub, bir sıra respublika və ümumittifaq elmi-konfrans və müsabiqələrdə iştirakçı və qalib seçilib. Üzeyir Hacıbəylinin anadan olmasının 100 illiyi ilə bağlı keçirilən müsabiqədə diplom, III respublika elmi konfransında ən yaxşı tələbə elmi-işinə görə qızıl medal, Zaqafqaziya ölkələri arasında keçirilən müsabiqədə I dərəcəli diploma layiq görülüb. Konservatoriyanı fərqlənmə diplomu və Ü.Hacıbəyli adına fərdi təqaüdlə bitirdikdən sonra elə həmin ildən "Musiqi tarixi" kafedrasına müəllim kimi fəaliyyətə başlayıb və Avropa ölkələrinin musiqi tarixi, Türkdilli xalqların musiqi mədəniyyəti, Musiqi tənqidi kimi fənlərdən dərs deyib və həmin kafedranın dosenti (1990-2016) olub. Bəstəkar, musiqişünas Aygün Səmədzadə 2003-cü ildən Azərbaycan Bəstəkarlar İttifaqının üzvüdür.

Aygün Səmədzadə 2003-cü ildə böyük türk bəstəkarı Əhməd Adnan Sayqunun yaradıcılığı ilə bağlı namizədlik dissertasiyasını müdafiə edib. Bundan əlavə, Aygün Səmədzadə Azərbaycan musiqi tarixinə aid bir sıra elmi məqalələrin və publisistik yazıların, o cümlədən, "Azərbaycanda sənət himayədarlığının rolu", "Xurşudbanu Natəvan və Azərbaycan mədəniyyəti", "Şah İsmayıl Xətai və Azərbaycan mədəniyyəti", "Mir Mövsün Nəvvab", "Hacı Zeynalabdin Tağıyevin mədəniyyətimizin inkişafında xidmətləri", "Adnan Sayqun yaradıcılığının bəzi üslub xüsusiyyətləri" adlı məqalələrin müəllifidir.

Aygün Səmədzadə bir çox tanınmış müğənnilərin repertuarında xüsusi yer tutan 200-dən artıq mahnının müəllifidir. Bu əsərlərin bir çoxu "Bu dünyanı nağıl bilək" albomu, "Əhməd Cavad" albomu, 4 diskdən ibarət "Azərbaycan" albomu və "Vətən mahnıları" albomunda cəmlənib.

Aygün Səmədzadə bir çox teatr tamaşaları və filmlər üçün də musiqilər bəstələyib. Elçin Əfəndiyevin "Qatil", "Şekspir", Hüseyn Cavidin "Əmir Teymur", "Iblis", İlqar Fəhminin "Mənəm, mən…", Stefan Sveyqin "Yad qadının məktubu" teatr tamaşalarının, "Əlavə təsir", "Sirr", "Axırıncı dayanacaq" filmlərinin bəstəkarıdır.

Aygün Səmədzadə “Türküstan”, “Həsrət”, “Qumsal”, “Eşq” simfonik lövhələrinin, “Həzrət-i Fatimə” adlı vokal-xoreoqrafik kompozisiyasının, Cümhuriyyətin 100 illiyinə həsr olunmuş “İstiqlal marşı”nın müəllifidir. Müharibə dövründə Aygün Səmədzadə “Diaspora” marşı, “Can Azərbaycan”, “Zəfər nəğməsi”, “Qəhrəmanım” kimi silsilə mahnılar bəstələyib.

Bəstəkarın ən son nailiyyətlərindən biri kimi İkinci Qarabağ müharibəsində qələbəmizə həsr olunmuş “HƏSRƏTƏ SON” layihəsini göstərmək olar. Qeyd edək ki, əsərin video həlli işğaldan azad olunmuş torpaqlarımızda baş tutub və bu, erməni vandalizminin incəsənət xətti ilə dünyaya çatdırılmasında maraqlı təşəbbüslərdən sayıla bilər.

Aygün Səmədzadə Əhməd Cavadın sözlərinə silsilə əsərlər yaradıb. Bunların sırasına “Ey Türk” kantatası (“Ey Türk”, “Bismillah”, “Türk Ordusuna”, “Elin bayrağı”, “Mən bulmuşam”, “Susmaram”, “Şəhidlərə” kimi müstəqil nömrələrdən ibarət), “Sən ağlama” vokal-instrumental kompozisiyası, “Niyə gəlmədin?”, “Qurban olduğum” romansları və başqaları daxildir. Bu əsərlərin premyeraları 2018-ci il 15 sentyabrda Ankarada, 2018-ci il 10 noyabrda Bakıda, 2019-cu il 20 martda Eskişehirdə baş tutub. Əsərlər Türkiyə Cümhurbaşkanlığı Simfonik Orkestrası, TRT xoru, Azərbaycan Dövlət Simfonik Orkestri tərəfindən ifa olunub.

2000-ci il "Best of Best" müsabiqəsində onun “Məktəb illəri”, 2002-ci ildə keçirilən "Nəğmələrin nəğməsi" müsabiqə-festivalda “Bu dünyanı nağıl bilək”, “Yağış” mahnıları birinci yerlərlə mükafatlandırılıb, “Tut ağacım” isə “Qran-pri” və “Tamaşaçı rəğbəti” mükafatlarına layiq görülüb.

2008-ci ildə Milli Olimpiya Komitəsinin Mədəniyyət və Turizm Nazirliyi, Azərbaycan Bəstəkarlar İttifaqı ilə birgə elan etdiyi "İdman və Olimpiya" mövzusunda mahnı müsabiqəsinə təqdim etdiyi “Qələbə çal” adlı əsəri birinci yerə layiq görülüb.

Bəstəkarın 2005, 2009, 2015-ci illərdə Heydər Əliyev Sarayında, 2015-ci ildə Beynəlxalq Muğam Mərkəzində, 2017-ci ildə Şəkidə keçirilən "İpək yolu" Beynəlxalq Musiqi festivalında, 2018-ci ilin iyunun 9-da Cümhuriyyətin 100 illiyi münasibətilə Yaşıl Teatrda müəllif konsertləri olub.

Aygün Səmədzadə Azərbaycan mədəniyyətinin təbliği ilə bağlı bir sıra televiziya layihələrinin, o cümlədən "Əslində Mən", "Bir mahnının tarixçəsi", "İntrada", "Ekspromt" verilişlərinin ideya müəllifi və rəhbəri olub. 2019-cu ildə Azərbaycan bəstəkarlarının Vətən haqqında mahnılarından ibarət "Azərbaycan 100 mahnıda" klavirinin ideya müəllifi və layihə rəhbəri olub.

2011-ci il sentyabr ayının 15-də “Azərbaycan Respublikasının Əməkdar incəsənət xadimi”, 2018-ci ilin 27 mayında isə “Azərbaycanın Xalq artisti” fəxri adına layiq görülüb.