Bakı Şəhər Mədəniyyət Baş İdarəsinin tabeliyində olan Səbail rayon Mərkəzləşdirilmiş Kitabxana Sisteminin Mərkəzi Kitabxanasının təşkilatçılığı ilə Azərbaycan Silahlı Qüvvələrinin polkovnik- leytenantı, Vətən müharibəsi şəhidi Vidadi Xəlilovun anım gününə həsr olunmuş tədbir keçirilib. Tədbirdə rəsmilər, ziyalılar, mədəniyyət işçiləri, şəhidin ailə üzvləri iştirak ediblər.

İlk öncə Azərbaycan Respublikasının Dövlət Himni səsləndirilib, şəhidlərimizin ruhu bir dəqiqəlik sükutla yad edilib.

Sonra tədbir iştirakçıları üçün Vətən müharibəsi şəhidi polkovnik-leytenant Vidadi Xəlilovun şərəfli həyat və döyüş yolundan bəhs edən videoçarx nümayiş olunub.

Tədbirdə çıxış edənlər Vidadi Xəlilovun həyatı, döyüş yolu, barədə danışıblar. Bildiriblər ki,  Azərbaycan Ordusunun şəhid zabiti Vidadi Xəlilov Cəbrayılın, Qubadlının və Laçının azadlığı uğrunda gedən döyüşlərdə igidlik göstərib. Vətənpərvər zabit düşmən qüvvələrinin məhv edilməsində şücaət göstərərək, oktyabrın 31-də Laçın rayonunun ərazisində gedən ağır döyüşlərdə şəhidlik zirvəsinə ucalıb. Azərbaycan Respublikasının Prezidenti İlham Əliyevin müvafiq sərəncamları ilə polkovnik-leytenant Vidadi Xəlilov ölümündən sonra "Vətən uğrunda", "Cəbrayılın azad olunmasına görə", "Qubadlının azad olunmasına görə", "Laçının azad olunmasına görə" və "Hərbi xidmətlərə görə" medallarına layiq görülüb.

Sonra Azərbaycan Milli Konservatoriyası tərkibində İncəsənət Gimnaziyasının müəllim və şagirdlərinin ifasında qəhrəman şəhidimizə həsr olunan şeirlər səslənib, musiqilər ifa olunub, kompozisiya təqdim edilib.