Bu kökəni həm kartof, həm də ətli içlik ilə hazırlaya bilərsiniz. Aşağıda reseptdə hər ikisinin necə hazırlanması haqqında məlumat veririk. İstədiyiniz içliyi seçib, bu ləziz kökələri hazırlayın və ya hər içdən yarım porsiya  bişirib, həm kartoflu, həm ətli kökədən zövq alın.

Ərzaqlar:

Xəmir Üçün

1 stəkan ilıq su

1  çay qaşığı toz maya

3 stəkan əla növ buğda unu

1 çay qaşığı duz

1 xörək qaşığı şəkər tozu

Yarım  stəkan süd

1 yumurta və 1 yumurtanın ağı (sarısını üstü üçün ayırın)

Yarım stəkan duru yağ

İçlik üçün:

Kartoflu İç:

3 xörək qaşığı duru yağ

1 baş xırda doğranmış soğan

4 ədəd orta boy kartof

1/3 stəkan xırda doğranmış şüyüd  (və yaxud keşniş ya da cəfəri)

zövqə görə duz

zövqə görə istiot

Ətli İç:

3 xörək qaşığı duru yağ

1 baş xırda doğranmış soğan

400  qram çəkilmiş mal əti

zövqə görə duz

zövqə görə istiot

Əvvəlcə xəmiri hazırlayın. Bunun üçün mayanı ilıq suda əridin. İri dərin qabda un, duz və şəkər tozunu qarışdırın. Üstünə mayalı suyu, südü, yumurta və duru yağı əlavə edib, əlinizlə yaxşıca qarışdırın, sonra isə təxminən 5-6 dəqiqə ərzində xəmir yoğurun. Xəmir elastik və zərif olmalı, ələ yapışmamalı amma çox bərk də olmamalıdır. Xəmiri dərin qaba geri qoyub, üstünü örtün və 2  saat ərzində isti yerdə gəlməyini gözləyin.

Xəmir gəlməyə davam etdiyində, istədiyiniz içdən birini seçib hazırlayın.

Kartoflu içliyin hazırlanması: Kartofu suda bişirib, qabığını soyun və püre halına gələnədək əzin. Bir tavada yağı qızdırıb, soğanı bu yağda bir az rəngi dönənə kimi qızardın.  Soğanı, göyərtini kartofa əlavə edin. Zövgə görə duz və istiot vurub, qarışdırın.

Ətli İçin hazırlanması: Tavada yağı qızdırın. Soğanı bu yağda yumşalanadək  qızardın. Çəkilmiş əti əlavə edib soğanla bərabər, tez-tez qarışdıraraq qızardın. Zövgə görə duz və istiot vurub, qarışdırın. Bu qarışığı ət maşınından bir dəfə keçirin,bu, içliyin narın olması üçün edilir.

Xəmiri 22-25 kündəyə ayırın. Hər kündənin diametri təxminən 4 sm olmalıdır.

Kündələri bir-bir əlinizə götürün və  təxminən 1 xörək qaşığı içlik qoyun, və dairənin kənarlarını bir yerə gətirərək, dairəni bağlayın.

Kökələri yağlanmış soba listinə aralı-aralı düzün və 15 dəqiqəliyinə kənara qoyun. Bu müddət ərzində kökələr bir az şişəcək. Sobanı 180-dərəcədə  isidin.

Kökələrin səthinə yumurta sarısı sürtüb, sobada təxminən 25 dəqiqə ərzində üstləri qızaranadək bişirin.

Nuş Olsun!