Azərbaycanın “Avroviziya 2025” mahnı müsabiqəsindəki rəsmi mahnısı bəlli olub. “Mamagama” qrupu may ayında Avropa səhnəsinə "Run with U" adlı dinamik və enerjili mahnı ilə çıxacaq. Mahnının sözləri Asəf Mişiyevə, musiqisi Asəf Mişiyev, Həsən Heydər və Roman Zilianevə aiddir.

İctimai Televiziyadan AZƏRTAC-a bildirilib ki, “Run with U” müasir səs texnologiyası, güclü ritmləri və təsirli melodiyası ilə Avroviziya səhnəsinə yeni bir nəfəs gətirəcək. Mahnı dinləyicilərə ruhlandırıcı bir hiss bəxş etməyi hədəfləyir.

Mahnının futuristik üslubda çəkilmiş rəsmi klipində Azərbaycanın Avroviziya tarixində iştirak etmiş sənətçilər də yer alır. Klipin əsas süjeti musiqinin gücünü vurğulayan maraqlı hekayəyə əsaslanır: bir robot həyata qayıtmaq üçün mübarizə aparır, lakin qrup üzvləri Həsən və Arifin bütün cəhdlərinə baxmayaraq, bu, mümkün olmur. 2023-cü ilin Avroviziya iştirakçıları, əkiz qardaşlar Tural və Turan da dəstək olmaq üçün onlara qoşulur, lakin yenə də alınmır. Sonda 2024-cü ilin iştirakçıları Fahree və İlkin Dövlətovun gəlişi ilə hər şey dəyişir. Əsrarəngiz səsi ilə seçilən və muğamlarımızın möhtəşəm ifaçısı olan İlkin Azərbaycanın dərin mədəni irsini yaşadan sazı gətirir və onu Həsən və Arifə təqdim edir. Sazın simlərinə toxunulduğu anda sehr baş verir – robot həyata qayıdır.

Əvvəlki illərdə Azərbaycan milli alətləri Avroviziya səhnəsində yer alsa da, ilk dəfə olaraq sazın sədaları bütün Avropaya yayılacaq. Bu alət musiqinin ruh və insan arasındakı güclü əlaqəsini, hətta cansız obyektlərə belə həyat vermə gücünü simvolizə edir.

Klipin yaradıcı heyəti musiqi və vizual estetikanın mükəmməl ahəngini yaratmağa çalışıb. Avroviziyada Azərbaycan nümayəndə heyətinin rəhbəri Nurlana Cəfərova və media rəhbəri Turab Teymurov bu barədə fikirlərini bölüşüb: "Biz bu klipi sadəcə musiqi videosu kimi deyil, həm də dərin mənaya malik hekayə kimi qurduq. Robotun həyata qayıtması yalnız texnologiyanın deyil, musiqinin insan ruhuna təsir edən əbədi gücünün göstəricisidir. Sazın bu prosesdə əsas rol oynaması isə mədəni irsimizə olan sevgimizin və hörmətimizin simvoludur. Ümid edirik ki, bu vizual və musiqi harmoniyası tamaşaçılara unudulmaz bir təcrübə bəxş edəcək."

Klipin rejissoru Elvin Əhmədoğludur və o, vizual estetika və emosional hekayəni ustalıqla birləşdirərək unikal iş ortaya qoyub.

“Mamagama” qrupu gənc və istedadlı musiqiçilərdən – Asəf Mişiyev, Həsən Heydər və Arif İmanovdan ibarətdir. Onların musiqisi fərqli üslubların birləşməsi və modern yanaşmaları ilə seçilir. "Run with U" mahnısı qrupun yaradıcılığını beynəlxalq auditoriyaya tanıtmaq üçün böyük bir imkan olacaq. “Mamagama” mayın 13-də Avroviziya mahnı müsabiqəsinin birinci yarımfinalının ikinci hissəsində səhnəyə çıxacaq.

Rəsmi klipi və mahnını Avroviziyanın rəsmi yutub kanalında izləyə bilərsiniz.