Bakı Şəhər Mədəniyyət Baş İdarəsi Nərimanov rayon Mərkəzləşdirilmiş Kitabxana Sisteminin Mərkəzi Kitabxanasının əməkdaşı Ülkər Zeynalova rus yazıçısı, publisisti və filosofu Lev Tolstoyun "Anna Karenina" əsəri haqqında videoçarx hazırlayıb.

Kitabxana əməkdaşının təqdim etdiyi materialda bildirilib ki, "Anna Karenina" əsəri Lev Tolstoy tərəfindən yazılmış və ilk dəfə 1873-1877-ci illərdə bölümlər halında nəşr edilmiş romandır. Əsərin baş qəhrəmanı olan Anna Kareninanın prototipi A.S.Puşkinin qızı Mariya Qartunq hesab edilir. Əsər 1870-ci illərdə Rusiyada cəmiyyətin üst sinfinə mənsub olan iki insanın eşqindən bəhs edir. Hadisələr Moskvada və Peterburqda cərəyan edir. Bundan əlavə, L.N. Tolstoy əsərdə Rusiyada patriarxal həyat tərzi qalıqlarının burjua tərəqqisinin təzyiqi altında necə dağıldığını da təsvir edir. Roman çox məqamlarda avtobioqrafik xarakter daşıyır. Əsərin üzərində işləyərkən Tolstoy müasirliyi və öz həyatını yenidən aydınlaşdırıb.

Müəllif romanda bir evin, bir ailənin problemindən başlayır və bütün Rusiyanın üzləşdiyi çətinliklərə toxunur.

Hissləri dolaşıq düşmüş, həyatda azıb qalmış bir qadın haqqındadır bu roman. Onun hər şeyi var: əri, oğlu, evi, sərvəti, adı. Amma o heç nəyə baxmadan bunların hamısından imtina edir! O, özünü eşq girdabına atır və bununla da öz həyatını çətinləşdirir.

Anna Karenina obrazı çox ziddiyyətlidir. Həyatı alt-üst olduğu üçün oxucunun ona yazığı gəlir, məşuqundan ötrü öz oğlunu atdığı üçün isə oxucu ona nifrət edir.

Mövzu ilə əlaqədar videoçarxa aşağıdakı keçidlərə daxil olaraq baxa bilərsiniz:

https://www.instagram.com/tv/CZwCHWogpaD/?utm_source=ig_web_copy_link

https://www.facebook.com/100007549111926/videos/494555875433267/