Amitabh Baççan 11 oktyabr 1942-ci ildə Hindistanın şimalında yerləşən Allahabad şəhərində məşhur hind şairi Harivanş Ray Baççan (əsl soyadı Şrivastav) və arvadı Teci Baççanın ailəsində anadan olub. 1969-cu ildə karyerasına başlayan Amitabh Hindistanın ən məşhur aktyorlarındandır. O, Hindistan kinematoqrafçıları tərəfindən “Minilliyin aktyoru” adını alan yeganə sənətkardır. Amitabhın Acitabh adlı kiçik qardaşı var.

Əvvəlcə 1970-ci ildə çəkilmiş “Gecikmiş qisas’’ filmi ilə populyarlıq qazanıb və Bollivud ekranında Hindistanın "qəzəbli gənc"i adını alıb. İndiyədək, təxminən, 190-dan çox hind filminə çəkilib. “Divar” (1975), “Qisas və qanun” (1975), “Məhəbbət həyatdır” (1976), “Amar, Əkbər, Antoni” (1977), “Don” (1978), “Şakti” (1982), “Şahənşah” (1988), “Sevənlər” (2000), “Sevincdə və kədərdə” (2001), “Bağban” (2003), “Sevirsən?” (2004), “Vir və Zara” (2004), “Son ümid” (2005), “Banti və Babli” (2005), “Heç vaxt əlvida demə” (2006), “Ata” (2006), “Codha və Əkbər” (2008), “Böyük Getsbi” (2013), “Sarkar 3" (2017) filmlərindəki rolları ilə tamaşaçı kütləsinin rəğbətini qazanıb.

Baççan hind kino tarixinin ən böyük və ən nüfuzlu aktyorlarından biri kimi dünyada tanınır. O, karyerasında çoxsaylı mükafatlar qazanıb, o cümlədən milli film mükafatlarında dörd dəfə “Ən yaxşı aktyor’’ və beynəlxalq kinofestivallarda bir çox mükafatlar qazanıb.

Amitabh Baççan 1973-cü ildən aktrisa Caya Bhaduri ilə evlidir. Onların iki övladı var: qızı Şveta və oğlu Abhişek. Oğlu aktyordur. Abhişek Baççan 2007-ci ildən aktrisa Ayşvariya Rayla evlidir. Üç Milli kino və 11 Filmfare Awards mükafatlarının sahibidir. Hindistanın ali vətəndaş mükafatı: Padma Şri (1984), Padma Bhuşan (2001) və Padma Vibhuşan (2015) ilə təltif olunub.

Qeyd edək ki, SSRİ-də hind filmləri fantastik dərəcədə populyar idi. Bu melodramalarda oynayan aktyorlarla canlı təmas hər bir sovet tamaşaçısı üçün böyük sürpriz, inanılmaz gerçəklik sayılırdı. Azərbaycanda da hind aktyorlarının başgiccələndirici şöhrəti, bəzən hətta əndazəni keçən sevgisi o zamanın ən isti xatirələrində yaşayır. Belə aktyorlardan biri də məşhur Amitabh Baççan idi. Onun baş rolda oynadığı filmlər xalq arasında hədsiz sevilirdi. “Qanun və intiqam”, “Şakti”, “Üç məngənə”, “Bağışla, Aruna”, “Üç qardaş”, Qığılcım” və daha neçə-neçə ekran əsəri azərbaycanlı tamaşaçıların yaddaşında silinməz izlər buraxıb.  

1986-cı ildə Azərbaycana gələn A.Baççanı Bakıda böyük fanat kütləsi qarşılayıb.  

O zaman “Kino” qəzetinin baş redaktoru olmuş Mehdi Mükərrəmoğlu Modern.az-a o səfərin detalları ilə bağlı maraqlı məqamları danışıb: “1986-cı ildə  Daşkənddə növbəti beynəlxalq kino festivalı keçirilirdi. O zaman qaydaya görə bu nüfuzlu festivalda nümayiş olunan filmlərdən bir neçəsi Bakıya gətirilərək nümayiş olunurdu. Amitabh Baççan da öz filmini təqdim etmək üçün Bakıya gəlmişdi”-deyə o xatırlayıb.  

Bakıya oğlu Abişek və qızı Şveta ilə gələn A.Baççan çox isti və mehriban qarşılanıb. Məşhur aktyor Suraxanıdakı “Atəşgah”a da baş çəkib. “Bakıya səfərimdə “Atəşgah”a ziyarətimi yaxşı xatırlayıram. Məbəddəki divarlarda qədim hind dövrünə aid yazılar məni çox heyrətləndirmişdi. Azərbaycanda xalça sənətkarlığının yüksək səviyyəsinin şahidi oldum. Bakıda mənə bağışlanan zərif və gözəl xalçalar bu gün də evimi bəzəyir”-deyə Amitabh Baççan yazıb.

Amitabh Baççanı “Nizami” kinoteatrının qarşısında gördüyünü xatırlayan Mehdi Mükərrəmoğlu deyir ki, həmin vaxt Azərbaycana gələn nümayəndə heyətinin tərkibində daha bir neçə hind aktyoru da olub. Baççan bizim aktyorlarla – Leyla Bədirbəyli, Həsən Məmmədov və bir çoxları ilə görüşüb xeyli söhbət apardı. Amitabh Baççanın Bakıda olması xəbəri şəhərə ildırım sürəti ilə yayılıb. Onu görmək istəyən yüzlərlə gənc şəhərə axışıb. Lakin çox az bir qismə Baççanla şəxsən görüşüb avtoqraf almaq nəsib olub. Deyilənə görə, onlardan biri o zaman yeniyetmə qız olmuş Aygün Kazımova olub.