Tanınmış qarmon ifaçısı Aslan İlyasov 1948-ci ildə may ayının 22-də Salyan şəhərində anadan olub. 15 yaşından başlayaraq Salyan rayon Mədəniyyət Evində musiqiçi kimi işləyib. 1980-ci ildə Bakı şəhəri Azərbaycan Konsert Birliyində solist kimi fəaliyyətini davam etdirib. 2005-ci ildən M.Maqomayev adına Azərbaycan Dövlət Filarmoniyasında solisti olub.

Aslan İlyasov sənətindən başqa, xalqı üçün bir çox xeyriyyə işləri də görüb. O, doğulub boya-başa çatdığı Salyan rayonunda geniş abadlıq işləri aparmış, park saldırıb. Aslan İlyasov rayon əhli üçün məscid inşa etdirib.

Mahir qarmon ifaçısı, xalqın çox sevib dəyər verdiyi Aslan İlyasov, həmçinin özünün yazdığı "Aslanı" rəqsi ilə də qəlbləri fəth edib. "Aslanı" kompozisiyası rəqs olsa belə, çox incə və kövrək notlarla dolu əsərdir.

Musiqiçinin Azərbaycan Dövlət Televeziya və Radiosunun videoteka və fonotekasında ifa etdiyi 30-a yaxın musiqinin lent yazıları saxlanılır. Özünün bəstələdiyi 20-yə kimi rəqs bu gün də Azərbaycan xalqının qəlbində yaşayır, daim el şənliklərində səslənir.

1994-cü ildə Tehran şəhərində bu ustad ifaçının kompakt-kasseti satışa buraxılıb.

Aslan İlyasov 20 dekabr 2013-cü ildə uzun sürən ağır xəstəlikdən sonra Bakı şəhərində vəfat edib.