Rafiq Hüseynov 1946-cı il avqustun 4-də Şuşada anadan olub. O, həyatının böyük hissəsini Bakıda keçirib. Rafiq Hüseynov orta məktəbi bitirdikdən sonra şərqşünaslıq üzrə təhsil almaq istəyir, lakin onun sənədləri qəbul edilmir. Bu səbəbdən o, 17 yaşında Azərbaycan Televiziyasında çalışmağa başlayır. Rafiq Hüseynov burada iki il işıqçı kimi işləyir.

Bir müddət sonra Rafiq Hüseynovu diktorlar müsabiqəsinə dəvət edirlər. O, bu müsabiqədən uğurla keçir və 1966-cı ildən diktor kimi fəaliyyətə başlayır.

Rafiq Hüseynov fəaliyyət göstərdiyi müddətdə Moskvanın ali dərəcəli diktoru səviyyəsinə yüksəlir. O, keçmiş Sovet İttifaqında ən yaxşı diktorlardan biri hesab edilirdi. Rafiq Hüseyno vMoskvada mərkəzi televiziyadan iş təklifi alsada, o, bu təklifi rədd edir.

Rafiq Hüseynovun filmoqrafiyasına “Şəki”, “Ölü zona”, “Fəryad”, “Ailə” və başqa sənədli filmlər daxildir. Diktorun səsləndirdiyi mətnlər, sənədli filmlər və apardığı verilişlər televiziyanın fondunda saxlanılır. O, həmçinin bir müddət AzTV-nin sədr müavinivəzifəsində çalışıb.

Diktor, Əməkdar artist və Xalq artisti fəxri adlarını alıb. Rafiq Hüseynov 1991-ci ildə Dövlət Mükafatına, 2016-cı ildə Azərbaycan Kinematoqrafçılar İttifaqının təsis etdiyi illik mükafata layiq görülüb. Həmçinin o, professor elmi adını alıb.

Rafiq Hüseynov 26 oktyabr 2017-ci ildə Almaniyanın Düsseldorf şəhərində xərçəng xəstəliyindən vəfat edib və 3 noyabr 2017-ci ildə Bakıda, Yasamal qəbiristanlığında dəfn olunub.