1950-ci il avqust ayının 29-da Bakının Buzovna qəsəbəsində dünyaya gələn Mirzə Ağabəyli 1971-75-ci illərdə M.A.Əliyev adına Azərbaycan Dövlət İncəsənət İnstitunda SSRİ xalq artisti, professor Mehdi Məmmədovun rəhbərlik etdiyi “Dram və kino aktyorluğu” fakültəsində təhsil alıb. 1975-ci ildə təyinatla S.Rəhman adına Şəki Dövlət Dram Teatrına göndərilib. 1976-cı ildə hərbi xidmətə çağırılıb. 1977-ci ildə isə M.A.Əliyev adına Azərbaycan Dövlət İncəsənət İnstitutunun nəzdində "Tədris" teatrında aktyor vəzifəsində işləyib. Yaradıcılığa isə məktəb illərində dram dərnəyində, sonralar isə Xalq teatrında başlayıb.

1982-ci ildə Azərbaycan Dövlət Milli Akademik Dram Teatrına dəvət olunub. Teatrda yaratdığı irili-xırdalı obrazlarla hər zaman tamaşaçı rəğbəti qazanıb. Mirzə müəllimin obrazlar qalereyası çox zəngindir, burada klassik dramaturgiya nümunələrinə, müasir əsərlərə də rast gəlmək olar. Həm düşündürməyi, həm də güldürməyi bacaran aktyor kiçik mizanlarla və təbiətindən irəli gələn sadəliklə obrazın daxili aləmini tamaşaçıya elə çatdırır ki, istər-istəməz qəhrəmanın səhnədə və ya zalda olmasını unudursan, obraza məkan və zaman prizmasından yanaşanda, onun gündəmin bir parçası olduğunu anlayırsan.

Bu fikri aktyorun kino qəhrəmanlarına da şamil etmək olar, televiziya tamaşalarında izlədiyimiz rollara da. Onlar bəzən həcmcə kiçik olsalar da, özləri ilə böyük bir yük götürüb yaddaşlarda qalır: “Adı sənin, dadı mənim”, “Bir ovuc torpaq”, “Biz qayıdacağıq”, “Bomba”, “Evləri köndələn yar”, “Ərazi”, “Fədakar”, “Kommersiya”, “Küçələrə su səpmişəm”, “Qəzəlxan”, “Qızlar”, “Mənim günahım”, “Moskva-Bakı qatarı”, “Ovsunçu”, “Ölüm növbəsi”, “Səhərə inan”, “Sonuncu dərviş”, “Sübhün səfiri”, “Ünvansız eşq”, “Yollar görüşəndə”, “Yük”, “Qardaşımdan yaxşısı yox idi”…

Aktyor müsahibələrinin birində deyib ki, “Mənə sənətdə ilk əlifbanı öyrədən Mehdi Məmmədov olub, kinoda isə Şahmar Ələkbərov. 40 yaşında ilk dəfə Şahmar Ələkbərov məni kinoya dəvət etdi. Dedi ki, Əliağa Vahidin həyatından film çəkirik, bütün aktyorlar tapılıb, Əliağa Vahidin yaxın dostu olan Ağahüseyn roluna aktyor tapa bilmirik. Beləliklə, ilk dəfə “Qəzlxan” filminə çəkildim”. Mirzə Ağabəyli yaradıcılığının kino mərhələsi belə başlayır. Şahmar Ələkbərov Bakı milyonçusu Ağa Musa Nağıyevin həyatından bəhs edən filmdə də onu baş rola dəvət edir. Ancaq ömür vəfa etmir, Şahmar müəllim qəflətən dünyasını dəyişir. 1995-ci ildə “Yük” filmi istehsalata buraxılır. Mirzə müəllimin yaratdığı Ağa Musa Nağıyev qeyri-adi xarakteri, həyata baxışı, insanlara yanaşması olan tragi-komik obrazdır. Təzadlı xasiyyətə malik Bakı milyonçusunun taleyüklü ömür yolunun plastik həlli isə onun Xəzərin sahilində ifa etdiyi “Qağayı” rəqsi ilə ifadə olunur. Dəniz, Qağayı, Səmanın ənginliklərinə pərvaz etmək arzusu… Təsadüfi deyil ki, bu film beynəlxalq kino festivallarında da uğur qazanır.

Azərbaycan Respublikasının Əməkdar artisti Mirzə Ağabəylini ad günü münasibətilə təbrik edir, ona cansağlığı və yeni-yeni yaradıcılıq uğurları arzulayırıq.