Azərbaycan romantik aktyor məktəbinin istedadlı nümayəndəsi, gur səsli, coşqun səhnə temperamentli teatr və kino aktyoru, Azərbaycanın Xalq artisti Mikayıl Şahvələd oğlu Mirzəyev 1947-ci il yanvarın 1-də Şamaxının (indi Ağsu rayonunun) ərazisində yerləşən Talış kəndində doğulub. ADİİ-nin Dram və kino aktyorluğu fakültəsini bitirib (1969). Institutun Tədris Teatrında işləyib. 1976-cı ildən 2000-ci ilə qədər (müxtəlif fasilələrlə) AMDT-də aktyor işləyib. İki dəfə Milli Məclisə deputat seçilib. Azərbaycan Respublikasının Xalq artistidir (22 may 1991).

Mikayıl Mirzə teatrda Kürd Musa, Fərhad ("Vaqif" və "Fərhad və Şirin", Səməd Vurğun), Muradov, Eyvaz ("Qəribə oğlan" və "Bizim qəribə taleyimiz", İlyas Əfəndiyev), Aslan ("Kəndçi qız", Mirzə İbrahimov), Zahid ("Fəryad", Bəxtiyar Vahabzadə), Elxan ("Od gəlini" Cəfər Cabbarlı), Cinli Mustafa ("Dəli yığıncağı", Cəlil Məmmədquluzadə), İxtiyar ("İblis", Hüseyn Cavid) rollarını oynayıb.

Bakı Mədəni Maarif Texnikumunun direktoru olub (1992-1995).

Mikayıl Mirzə 2006-cı il iyunun 3-də dünyasını dəyişib.