İlhamə Məzahir qızı Quliyeva 17 avqust 1943-cü ildə Lənkəran şəhərində anadan olub.

1964-cü ildə Azərbaycan Dövlət Universitetini bitirib. 1965-1970-ci illərdə Azərbaycan Dövlət Teleradio Verilişləri Şirkəti Estrada Orkestrinin, 1970-1980-cı illərdə isə Azərbaycan Dövlət Filarmoniyasının solisti olub. 1980-cı ildən Azərbaycan Dövlət Qastrol-Konsert Birliyinin (Azkonsert) solisti idi. Repertuarına Azərbaycan və xarici ölkə bəstəkarlarının əsərləri olub. Bir sıra xarici ölkələrdə (İngiltərə, İspaniya, Danimarka, Türkiyə, Almaniya və s.) qastrolda olub.

Dəyərli sənətkar İlhamə Quliyeva “Anam mehribanım Azərbaycanım”, “Gülür ellər”, “Toy mahnısı”, “Göygöl”, “De görüm neyləmişəm”, “Mən səni araram”, “Bir xumar baxışla”, “Çiçək yağışı”, “Gedirəm”, “Mənə həyatımsan de”, “«İncitmə qəlbimi”, “Qaragilə” və daha bir çox sevilən, yaddaqalan mahnıların ifaçısı olub.

O, “Toyda görüş” (film, 1970), “Göygöl” (film, 1973), “Mahnı qanadlarında” (film, 1973), “Payız melodiyaları” (film, 1974), “Oxuyan ürəkdir” (film, 2003), “Adam ol!” (film, 2005), «Adam ol!” 3” (film, 2007) kimi filmlərdə çəkilib.

1982-ci ildə “Azərbaycan SSR Əməkdar artisti”, 1998-ci ildə “Azərbaycan Respublikasının Xalq artisti”,  2008-ci ildə “Dağıstanın Xalq artisti” fəxri adlarına, 2002-ci ildə Azərbaycan Respublikasının “Şöhrət”, 2013-cü ildə “Şərəf” ordenlərinə layiq görülüb.

Xalq artisti İlhamə Quliyeva 25 fevral 2016-cı ildə tromboemboliyadan vəfat edib. 26 fevral 2016-cı ildə İkinci Fəxri Xiyabanda, anası Tükəzban İsmayılova və ögey atası Həbib Bayramovun yanında dəfn edilib.