Bakı Şəhər Mədəniyyət Baş İdarəsi Səbail rayon Mərkəzləşdirilmiş Kitabxana Sisteminin Mərkəzi Kitabxanası 9 may-faşizm üzərində Qələbə Günü ilə  bağlı  tədbir keçirib.

Tədbirdə 189-190  nömrəli  tam orta məktəbin tarix  müəllimi  Firuzə Məmmədli, dil-ədəbiyyat  müəllimi Pərvanə Səfərəliyeva və   8-ci sinif şagirdləri  iştirak  ediblər.

Tədbirdə  kitabxananın əməkdaşı Könül Əhmədova bu tarixi  günün  əhəmiyyəti  barədə  ətraflı  məlumat  verib. Bildirib ki, Azərbaycan faşizm üzərində Qələbəyə mühüm töhfələr verib. Bu şanlı Qələbədə böyük payı olan Azərbaycan xalqı cəbhəyə 600 mindən çox oğul və qızını yola salıb. Onların təxminən yarısı döyüş meydanlarından geri qayıtmayıb. Tarix  müəllimi  Firuzə  müəllimə  vurğulayıb ki, müharibə illərində göstərdikləri igidliyə görə 130-dan çox Azərbaycan vətəndaşı Sovet İttifaqı Qəhrəmanı adına layiq görülüb, 170 mindən çox əsgər və zabitimiz müxtəlif orden və medallarla təltif edilib. Azərbaycanlı çağırışçı və könüllülərdən formalaşdırılan 77-ci, 223-cü, 336-cı, 402-ci və 416-cı milli atıcı diviziyalar Qafqazdan Berlinədək şanlı döyüş yolu keçib. Xalqımızın qəhrəman övladları Moskva, Leninqrad, Kiyev, Stalinqrad, Simferopol, Odessa və irili-xırdalı digər yüzlərlə yaşayış məntəqəsi uğrunda rəşadətlə döyüşüblər. Qəhrəman azərbaycanlılar Polşa, Çexoslovakiya, Yuqoslaviya və digər ölkələrin azad olunmasında da yaxından iştirak ediblər. Partizan hərəkatında iştirak edən soydaşlarımızın da qəhrəmanlıq nümunələri saysız-hesabsızdır.

İkinci Dünya müharibəsində şərəfli döyüş yolu keçən Azərbaycan övladlarının heç vaxt yaddaşlardan silinməyən qəhrəmanlıq və şücaəti gənc nəsil üçün əsl vətənpərvərlik nümunəsidir.

Sonda  məktəblilər  Qələbə  gününə  həsr  olunan şeirlər  söyləyiblər, sərgi  nümayiş  olunub.