Cəmil Əlibəyov 1927-ci il dekabrın 5-də Füzuli rayonunun Dədəli kəndində dünyaya gəlib. O, təhsilini bir müddət evdə dayılarından alıb, sonradan məktəbdə davam etdirib. 1944-cü ildə Azərbaycan Dövlət Universitetinin filologiya fakültəsində yeni açılmış şərqşünaslıq şöbəsinə (İran bölməsi) qəbul edilib. Fars, ərəb, ingilis dillərində xüsusi uğurları olsa da, Şərq tarixi ixtisasını seçib, tələbə elmi konfranslarında diqqəti çəkən referentlərlə çıxış edib, elmi tədqiqatları Moskva Ali Təhsil Nazirliyinin və Respublika Təhsil Nazirliyinin mükafatlarına layiq görülüb.

Cəmil Əlibəyov 1949-ci ildə sınaq qaydası ilə "Azərbaycan gəncləri" qəzetinə işə götürülüb. İyirmi il həmin qəzetdə ədəbi işçi, şöbə müdiri, məsul katib, son on iki ildə baş redaktor kimi fəaliyyət göstərib. 1970-ci ildə C.Əlibəyov daha məsul işə Azərbaycan Respublikası Radio və Televiziya Verilişləri Komitəsinin sədr müavini təyin olunub, radioya başçılıq etməyə başlayıb. Həmin dövr radiosu öz verlişləri ilə xalqa, onun mənəvi dəyərlərinə, obrazlı dilinə daha da yaxınlaşıb (xalq yaradıcılığı "Bulaq" verilişi otuz ildən artıqdır ki, efirdədir). Bu verilişə görə C. Əlibəyov Azərbaycan Jürnalistlər İttifaqının "Qızıl qələm" mükafatına layiq görülüb.

1974-cü ildə Azərbaycanın rəhbəri H.Əliyevin şəxsi təklifi ilə C.Əlibəyova daha məsul vəzifə tapşırılıb. O, on il ərzində "Azərbaycanfilm" kinostudiyasının direktoru işləyib. Bu müddətdə istehsal olunan filmlər say və keyfiyyətcə yüksək qiymətləndirilib, Ümumittifaq, beynəlxalq və respublika mükafatlarına layiq görülüb. "Dədə Qorqud", "Babək", "Dərviş Parisi partladır", "Tütək səsi", "İstintaq", "Ad günü", "Qayınana", "Papaq" filmləri qızıl fonda daxil edilib.

“İlk addımlar” (1954), “Əmək və qəhrəmanlıq” (1955), “Şəhəri yaradanlar” (1957), “Sənin sərvətin” (1963), “Məhəbbət naminə” (1964), “Sınaq” (1966), “Dörd qitədə adım var” (1967), “Özümü axtarıram” (1969), “Nigarın arzusu” (1968), “Mənim analı dünyam” (1972), “Üç bacı” (1974), “Dözümlü məhəbbət” (1978), “Dünyanı gəzə-gəzə” (1979), “Vida görüşü” (1981), “Qızıl attorpaq” (1983), “Qış etüdləri” (1971), “Mənim analı dünyam” (1988), “Qış macərası” (1994) və s. kitabların müəllifidir.

Cəmil Əlibəyov 26 oktyabr 2014-cü il tarixində vəfat edib.