UNESCO-da “İpək Yolu gənclərin gözü ilə” 7-ci fot-müsabiqənin vaxtı uzadılıb. UNESCO dünyanın hər yerindən 14-25 yaşarası gəncləri foto aparatlarını götürməyə və ən yaxşı şəkillərini “İpək Yolları Gənclərin Gözü ilə” (Youth Eyes on the Silk Roads) adlı 7-ci Beynəlxalq Fotomüsabiqəsinə göndərməyə çağırır. Təşkilatın İctimai və Humanitar Elmlər Sektorunun İpək Yolları Proqramının bir hissəsi olan UNESCO-nun bu fotomüsabiqəsi İpək yolu regionlarında yaşayan xalqlar arasında mədəni qarşılıqlı əlaqəni, qarşılıqlı anlaşmanı və sülhü təşviq etmək üçün bir vasitə kimi fotoqrafiyanı təbliğ edir.

AZƏRTAC xəbər verir ki, 2018-ci ildə Reza Deqatinin təşəbbüsü və UNESCO-nun təşkilatçılığı ilə yaradılan müsabiqənin 7-ci buraxılışı “Qadınlar, İpək yolu irsinin keşikçiləridir” mövzusuna həsr olunub. Gənc fotoqraflar İpək yolunun ortaq irsinin qorunması və ötürülməsində qadınların mühüm rollarını araşdırmaq və çəkmək üçün dəvət olunurlar.

Qadınlar İpək yollarının ümumi irsinin qorunmasında və ötürülməsində mühüm rol oynamışlar və oynamaqda davam edirlər. Bununla belə, müxtəlif sahələr üzrə genişmiqyaslı töhfələrinə baxmayaraq, onların fəaliyyəti kifayət qədər tanınmamışdır. Qadınlar ənənələri formalaşdırıb və davam etdiriblər, kollektiv yaddaşı qoruyublar, bilik və bacarıqları nəsillər və bölgələr arasında ötürərək, Şərqi Asiya mədəniyyətinin Aralıq dənizinə, Orta Asiya, Hindistan yarımadası və Yaxın Şərqə davamlılığını təmin ediblər.

Müsabiqənin gənc iştirakçıları toxuculuq, tikmə, keramika və ya dulusçuluq kimi sənətkarlıqla məşğul olan qadınlar, qadınlar tərəfindən həyata keçirilən və ya ötürülən ənənəvi idman və oyunlar, qadınların ifa etdiyi musiqi, musiqi alətləri, rəqs və ya şifahi hekayələr, kulinariya ənənələri, qastronomiya, eləcə də İpək yolları boyunca mədəni və intellektual mübadilələrə töhfə verən yazıçı, pedaqoq, rəssam, tacir və ya elm adamı kimi çalışan qadınların fəaliyyətindən ilhamlana bilərlər. Həmçinin fotolar bayramlar, həyat tərzi və ya gündəlik həyat zamanı qadınların rəhbərlik etdiyi icmalararası və multikultural toplantılar, eləcə də İpək yolları bölgələrindən olan qadınların mədəni kimlik, möhkəmlik, bilik və sevinc, öyrənmə və ya bayram anlarını əks etdirən portretləri əhatə edə bilər.

Gənclər maksimum 20-yə qədər foto göndərə bilərlər. Gənclər fotoqrafiya vasitəsilə ortaq mədəni irsimizi əks etdirərək sülh və anlayışa töhfə verməyə dəvət olunurlar. Müsabiqə qaliblərinə qiymətli hədiyyələr təqdim olunacaq və müsabiqə ruhunu ən yaxşı şəkildə əks etdirən 60-a yaxın fotoşəkillər səyyar sərgi vasitəsilə müxtəlif ölkələrdə nümayiş etdiriləcək, seçilmiş fotoşəkillər peşəkar fotoalbomda nəşr olunacaq.

Müsabiqənin qalibləri fotoaparatlarla mükafatlandırılacaqlar.

UNESCO-nun İpək Yolu Proqramı çərçivəsində təşkil edilən fotomüsabiqəyə avqustun 5-dək müraciət olunmalıdır. Hər il keçirilən “İpək yolu gənclərin gözü ilə” adlı fotomüsabiqə İpək yolu üzərində olan mədəni irs abidələri ilə bağlı baxışları kameraların obyektivi ilə əks etdirmək üçün yaxşı fürsətdir.

Azərbaycanın gənc fotoqrafları da müsabiqədə iştirak etməyə dəvət olunurlar. Fotomüsabiqə ilə bağlı UNESCO-nun internet saytında bu linkdə daha ətraflı məlumat almaq olar: https://unescosilkroadphotocontest.org/fr

Əlavə suallar üçün [email protected]  elektron ünvanına müraciət oluna bilər.