Altay Seyid Hüseyn oğlu Mir-Bağırov 4 oktyabr 1934-cü ildə Bakı şəhərində anadan olub. 1941-1949 illərdə Bakı şəhəri Nizami rayonunun 201 saylı orta məktəbini əla qiymətlərlə bitirib, 1947-1949-cu illərdə Pionerlər sarayında təsviri sənət dərnəyində məşğul olub. O, 1949-1953-cü Bakı Neft texnikumunda Neft quyularının qazınması texniki ixtisas üzrə tam təhsil alıb. Altay Mir-Bağırov 1953-1955-ci illərdə Stalinqrad (indiki Volqoqrad) şəhərində Sovet Ordusu sıralarında xidmət edib və leytenant rütbəsi alıb. 

Altay Mir-Bağırov 1956-1962-ci illərdə Azərbaycan Politexnik İnstitutunun (indiki Azərbaycan Texniki Universiteti) Memarlıq fakültəsində oxuyub, "Çoxmərtəbəli ramplı qaraj” mövzususunda diplom işinini müvvəffəqiyyətlə müdafiə edib. 1962-1963-cü illərdə təyinat üzrə Novokuznetsk şəhərində "Sibir Promproekt” layihə institutunda memar vəzifəsində işləyib. O, 1963-1965-ci illərdə "Azərenerji” idarəsində tikinti sahəsində çalışıb. 1966-cı ildə SSRİ Memarlar İttifaqının üzvü olub. 

Altay Mir-Bağırov 1965-ci ildə Validə Baladadaş qızı Mir-Bağirova ilə ailə qurub. 

1965-2002-ci illərdə Moskva" Kurortlayihə” İnstitutunun Azərbaycan şöbəsində memar, layihələrin baş memarı, memarlıq və tikinti emalatxanasının rəisi vəzifələrində çalışıb. 2002-ci ildən 2009-cu ilə qədər "Azərinşaatlayihə” İnstitutunda Memarlıq şöbəsinin rəisi vəzifəsində işləyib. 

21 noyabr 2011-ci ildə Bakı şəhərində dünyasını dəyişib.

Tanınmış memardan bizə qalan yadigarlar isə Azərbaycanda və ölkəmizin hüdudlarından kənarda layihələndirdiyi binalardır: 1998-2004-cü illərdə paytaxtda, o cümlədən ölkəmizin müxtəlif şəhərlərində şəhid ailələri və əlillər üçün yaşayış binaları (36 yerdə, 4 mərtəbəli, 3 seksiyalı, 36 mənzilli), 2008-2009-cu illərdə isə 9 mərtəbəli 81 mənzilli  və 4 mərtəbəli 36 mənzilli yaşayış evləri (yeni variantda), 2003-2004-cü illərdə Göygöl rayonunun Çaykəndi kəndində xəstəxana, 1966-1967 illərdə Qəbələ rayonunda 400 yerlik "Qafqaz” turbazası, Naftalan şəhərində 1973-1975-ci illərdə "50 sərnişinlik aeroport - hava limanı (K.Səidov ilə birlikdə), 1982-1983-cü illərdə "Geran” sanatoriyası, 1989-1993-cü illərdə kurort sanatoriyasının poliklinikası, 2007-ci ildə Şəmkir rayonunda İdman Olimpiya Kompleksi üçün "Kottej - yaşayış evi”, 2003-2004-cü llərdə Bakı şəhəri, İ.Qutqaşınlı küçəsi 79 ünvanında bir bloklu, 17 mərtəbəli, 12 maşın üçün qarajı və 2 səviyyəli mağazaları olan yaşayış binası, 1981-ci ildə Pirşağı qəsəbəsində Veteran sanatoriyasında əyləncə, oyun və yay kinoteatrı, 2008-ci ildə Fövqəladə Hallar Nazirliyi üçün Türkan qəsəbəsində, Lənkəran və Gəncə şəhərlərində növbətçi qülləsi, inzibati bina, hərbi qərargah, 2007-ci ildə Cəlil Məmmədquluzadə küçəsi, 3 ünvanında Müdafiə Nazirliyinin Hərbi Hospitalı, məktəb binaları və sairə tikililəri layihələndirib.

Azərbaycan Respublikası Dövlət Elm və Texnika sənədləri Arxivində Azərbaycan memarı Altay Səid Hüseyn oğlu Mir-Bağırova həsr olunmuş 162 №-li şəxsi fondu açılıb. Altay Mir-Bağırovun sənədlərinin şəxsi Arxivi fondunda Azərbaycan və keçmiş SSRİ məkanında 1965-2009-cu illəri əhatə edən layihələri elmi-texniki ekspertizadan keçirilib, onun fəaliyyətinin tarixi əhəmiyyəti nəzərə alınaraq, Arxivin Zəngin və qiymətli materialları fonduna daxil edilib.