Memarlıq daşın musiqisidir. Bu musiqini canlandıran, ona həyat verən, naxışlarla işləyib şəhərin, ölkənin rəmzinə çevirən isə memarlardır. Memarlıq sənəti incilərini nəzərdən keçirsək, hər abidənin yarandığı dövrün ənənəsinin, üslublarının, tarixi, sosial durumunun, mənsub olduğu ölkənin milli dəyərlərinin, mənəvi aləminin, dünyagörüşünün təcəssümü olduğunu görərik. İllər, qərinələr, əsrlər, minilliklər ötsə də, bu abidələr yaşayır və milli kimliyimizi sələflərdən xələflərə ötürür.

Bu gün sizə bir memar haqqında yazmaq istəyirəm. Qəhrəmanım sənətinin vurğunu, milli dəyərlərimizin təəssübkeşi, monumentallıq və klassik üslubu müasir meyllərlə ahəngdə birləşdirərək layihələrində və onlar əsasında tikilmiş binalarda bu xüsusiyyətləri rəmzlərlə, naxışlarla, memarlıq elementləri ilə müvəffəqiyyətlə ötürən ustad müasirimiz, respublika və beynəlxalq müsabiqələrdə uğurla iştirak etmiş, Heydər Əliyev Mərkəzinin baş memarı Sabir Məhərrəmovdur.

Sabir İsrafil oğlu Məhərrəmov 03 fevral 1949-cu ildə Şəki şəhərində anadan olub. 1973-cü ildə Azərbaycan Dövlət Politexnik İnstitutunun “Memarlıq” fakültəsini “memar” ixtisası üzrə bitirib. Elə həmin ildən Bakı Dövlət Layihə İnstitutunda əvvəl memar, sonra böyük memar, aparıcı memar vəzifələrində çalışıb. 1986-cı ilə qədər bu İnstitutda işlədiyi müddətdə Bakı Dəmir Yolu Vağzalı ətrafının tikili eskizi və müfəssəl planlaşdırma layihəsinin, “Şimali Abşeron” kurort zonasının Baş planının, Montin qəsəbəsinin cənub hissəsinin müfəssəl planlaşdırma layihəsinin, Bakı şəhərinin şərq hissəsinin tikili eskizinin, Pirşağı sanatoriya-kurort kompleksinin planlaşdırma layihəsinin, Mərdəkan-Gənclik yaşayış rayonunun cənub-şərq hissəsinin müfəssəl planlaşdırma layihəsinin, Pirşağı-Goradil-Sarıqaya kurort zonasının planlaşdırma layihəsinin, Bakı şəhəri “Günəşli” yaşayış rayonunun tikili eskizi və müfəssəl planlaşdırma layihəsinin və s. bina və tikililərin müəllifi olub.

1980-2009-cu illərdə Azərbaycan Respublikası Mədəniyyət Nazirlinin nəzdində Bədii Fondda memar işləyib. Burada da memarlıq abidələrinin bərpası, müasir görkəmi, yeni mədəniyyət obyektlərinin layihələndirilməsi və dəyərləndirilməsi sahəsində öz bilik və bacarıqlarını uğurla nümayiş etdirib.

Sabir Məhərrəmov 2009-2013-cü illərdə “BAKIHİDROLAYİHƏ” MMC-də baş memar, 2013-cü ildən isə Heydər Əliyev Mərkəzinin baş memarıdır.

Bu müddət ərzində ölkəmizdə və onun hüdudlarından kənarda onlarla yaşayış binası, mühəndis qurğusu, müxtəlif təyinatlı tikililərin layihələrini hazırlayıb, bu layihələr əsasında bir-birindən gözəl memarlıq inciləri ərsəyə gəlib. Onların arasında Azərbaycan Respubllikası Daxili İşlər Nazirliyi inzibati binasının yenidən qurulması layihəsini, DİN-in Polis Akademiyası ərazisində Heydər Əliyev Mərkəzinin və abidə kompleksini, “Xəzri” İstirahət və Sağlamlıq Mərkəzində kempinq, təhsil müəssisələri və digər binaların layihələrini, Dağıstanda məscid kompleksini, paytaxtda və bölgələrdə müxtəlif təyinatlı tikililərin, park və fəvvarələrin müfəssəl layihələndirilməsi və inşasına nəzarəti həyata keçirib.

Sabir müəllimin layihələri müxtəlif təyinatlı olsalar da, onları birləşdirən ümumi cəhət millilik və ənənəvilik, milli irsimizə dünyəvi yanaşma, təbiətlə harmoniya və dünyagörüşümüzün, etnoidentikliyimizin təsvir dili olan rəmzlərdən xüsusi incəlik və yüksək zövqlə istifadədir. Bu layihələrdə landşaft, iqlim və ekoloji amillər dəqiqliklə nəzərə alınmaqla yanaşı, onların birləşməsinin insana rahatlıq gətirəcəyi işıq və kölgə, rəng həlli də önəm kəsb edir. Beləliklə, özünü daş, beton, şüşə içərisində ev sahibindən daha çox, Günəşin nuru ilə dolu, küləyin bəzən ilıq, bəzən də sərt nəfəsi ilə cilalanan, Abşeron qumsallığı, Şuşa dağları, Şəkinin sıx meşələri, Göygölün bənzərsiz füsunkar gözəlliyi və Xəzər təlatümü bir araya gələrək insana sakiitlik, düşünmək, keçmişindən qürur duymaq, gələcəyə inamla irəliləmək, dünəni unutmadan sabaha aydın düşüncə ilə getmək, təbiətin bir parçası kimi onu qorumaq və cəmiyyətə yararlı olmaq üçün qurub-yaratmaq həvəsinə meydan açır. Bütün bunlar sənətkarın vətənpərvərıyinin, insanpərvərliyinin, mədəni irsimizə həsssiyyətinin bariz nümunəsidir.

Sabir Məhərrəmov 1978–ci ildən Azərbaycan Memarlar İttifaqının üzvüdür.

Tələbəlik illərindən başlayaraq layihələri ilə yerli və beynəlxalq müsabiqələrdə iştirak edərək müxtəlif diplomlar və mükafatlar alıb. Bakı Dövlət Layihə İnstitutunda fəaliyyətinə görə dəfələrlə təşəkkürnamələr, mükafat və Fəxri fərmanlarla təltif olunub. Dağıstanda dağların arasında ucalaraq möminlərin dualarını Haqqın dərgahına çatdıran, təbiətlə həmahəng olan məscid kompleksinin layihələndirilməsi və tikintisinin uğurla başa çatdırılması münasibətilə 23.11.2010-cu ildə “Dağıstan Respublikasının Fəxri vətəndaşı” adına layiq görülüb.

Daim axtarışda olan, bir-birindən gözəl layihələri ilə ölkəmizin memarlıq ansamblına təkrarsız töhfələr verən Sabir Məhərrəmovu doğum günü münasibətilə təbrik edir, ona möhkəm cansağlığı və yeni-yeni yaradıcılıq uğurları arzulayırıq.