Azərbaycanın müasir memarlıq incilərindən biri də "Eurovision - 2012" müsabiqəsi üçün inşa edilmiş və Dövlət Bayrağı Meydanının yaxınlığında yerləşən "Baku Crystal Hall"dur. Unikal memarlıq nümunəsi olan bu saray Azərbaycan Respublikasının Prezidenti İlham Əliyevin "Bakı şəhərində müasir idman-konsert kompleksinin inşa edilməsi haqqında" 2011-ci il 11 iyul tarixli Sərəncamına əsasən tikilib.

Mehriban xanım Əliyevanın rəhbərlik etdiyi təşkilat komitəsinin fəaliyyəti nəticəsində müsabiqəyə hazırlıq işləri ilə yanaşı, "Baku Crystal Hall"un inşası da qısa zamanda uğurla tamamlanıb. Mehriban xanım Əliyevanın müsabiqəni işıqlandıracaq jurnalistlərə təqdim olunan rəsmi proqram kitabçasında yer alan salamlamasında yarışmaya hazırlıqla bağlı deyilir: "Eurovision mahnı müsabiqəsinə hazırlıq bizdən böyük və gərgin əmək tələb etdi. Lakin bu gərginlik sizinlə xoş görüş ümidi ilə əvəzlənmişdir. Əminəm ki, müxtəlif mədəniyyətlərin qarşılıqlı zənginləşməsinə səbəb olan və xalqlar arasında olan birliyi daha da gücləndirən bu musiqi bayramının, gözəl Bakımızın və qonaqpərvər xalqımızın xoş xatirəsi qəlbinizdə daim yaşayacaqdır".

Mayın 7-də Prezident İlham Əliyev və xanımı Mehriban Əliyevanın iştirakı ilə "Baku Crystal Hall"un rəsmən açılışı olub. Qeyd edək ki, 25 min nəfərlik tamaşaçı yeri olan kompleks orijinal memarlığı ilə fərqlənir. Binanın fasadı gözoxşayan kristal elementlərlə  bəzədilib.  45 min işıq-diod lampa ilə işıqlandırılan arena genişmiqyaslı tədbirlər üçün möhtəşəm bir məkandır.

Kompleks 23 min nəfərdən çox tamaşaçı qəbul edə bilir. "Alpine BAU Deutschland AG" şirkəti təsdiq edir ki, "kompleks müasir beynəlxalq standartlara cavab verir və tamaşaçıların maneəsiz qəbulu üçün kifayət qədər giriş-çıxış yerlərinə malikdir. Standartlara uyğun olaraq, hər hansı fövqəladə hal baş verdikdə, stadion tamaşaçıları səkkiz dəqiqə ərzində təxliyə oluna bilərlər". Daha 16 min tamaşaçı isə zaldakı çıxışları canlı yayımla bayırdan izləyə bilirlər. Bunun üçün bayırda böyük monitorlar quraşdırılıb. Kompleksin yaxınlığında həmçinin 1500 nəfərlik Mətbuat Mərkəzi də fəaliyyət göstərir. 

"Baku Crystal Hall"un maketi Heydər Əliyev Mərkəzində nümayiş etdirilir.

Binanın fasadı həm zalda, həm də bayırda çoxsaylı müasir dinamik işıq qurğuları ilə təchiz olunub, bu isə müxtəlif effektlər yaratmağa imkan verir. Fasadın zahiri divarları parlayan kristallar şəklində işlənib və minlərlə işıq panelindən ibarətdir ki, onlar da axşam və gecə saatlarında memarlıq obyektinin 45 min çalarla parlaq işıqlandırılmasını təmin edirlər. Bu işıqlandırma şəhərin ən ucqar nöqtəsindən belə görünür. İşıq effektlərinin yaradıcısı – İsveçrənin "Nüssli İnternational AG" şirkəridir və o dünyanın heç bir yerində buna bənzər görüntünün olmadığını bildirir. 

Şəhərimizin gözəllik rəmzlərindən olan "Baku Crystal Hall" günün istənilən zamanında bənzərsizdir.