YARADICI Mədəni və Yaradıcı Sənayelərin İnkişaf Mərkəzində çilili rejissor Tomas Velsin animasiya filmləri nümayiş olunub.

AZƏRTAC xəbər verir ki, tədbir Azərbaycan Respublikası Mədəniyyət Nazirliyinin və Çilinin Azərbaycandakı səfirliyinin birgə təşkilatçılığı ilə baş tutub.

Tədbirin əvvəlində YARADICI Mədəni və Yaradıcı Sənayelərin İnkişaf Mərkəzinin direktoru Rəşad Cəfərov qonaqları salamlayaraq, mərkəzin missiyası və əsas fəaliyyət istiqamətləri barədə məlumat verib, həyata keçirilən layihələr və təşəbbüslər haqqında danışıb, həmçinin YARADICI-nın yaradıcı gənclərə və geniş auditoriyaya açdığı imkanlar barədə söz açıb.

Çilinin Azərbaycandakı səfirliyinin müvəqqəti işlər vəkili Xuan Salasar Alvares çıxışında Yaradıcılıq Mərkəzinin açıq fəaliyyət prinsipini yüksək qiymətləndirdiyini bildirib və Çili ilə yeni mədəni mübadilə mərhələsinə başlanması üçün yaradılan şəraitə görə rəhbərliyə təşəkkür edib.

Öz ölkəsi haqqında danışan diplomat Çilini şimal səhrasından Skandinaviya mənzərələrini xatırladan cənub bölgələrinədək uzanan, təxminən 4 min kilometrlik kontrastlar ölkəsi kimi səciyyələndirib. O qeyd edib ki, bu təbii rəngarənglik ölkə daxilində müxtəlif mədəni kodlar formalaşdırır və bu xüsusiyyəti ilə Çili zəngin və çoxqatlı irsə malik Azərbaycana bənzəyir.

Diplomat kinematoqrafiyanın mədəni identikliyin mühüm ifadəsi baxımından əhəmiyyətinə toxunub. O bildirib ki, XX əsrin əvvəllərindən inkişaf edən Çili kino sənayesi bu gün həm tarix və ənənələri qoruyur, həm də sosial və miqrasiya mövzularını gündəmə gətirir. Çili kinomatoqrafiyası artıq beynəlxalq aləmdə də tanınıb. 2016-cı ildə Çili istehsalı olan qısametrajlı animasiya filmi “Oskar” mükafatını qazanıb, 2018-ci ildə isə “Fantastik qadın” filmi ölkəyə ikinci “Oskar”ı gətirib.

Daha sonra bu tədbir üçün xüsusi hazırlanmış çilili kinorejissor Tomas Vels haqqında qısa videoçarx nümayiş etdirilib. Tədbirə onlayn formatda qoşulan Vels yaradıcılığı haqqında danışıb, iştirakçılarla fikir mübadiləsi aparıb və sualları cavablandırıb.

Sonda tamaşaçılara “Pasta”, “Verde que te quiero” və “Magic Dream” animasiya filmlərindən ibarət proqram təqdim olunub.

Tomas Vels animator, vizualist rəssam və pedaqoqdur. Onun animasiya filmoqrafiyası insan təbiətinə tənqidi baxışı, qaranlıq yumoru və rəngdən orijinal istifadəsi ilə seçilir. Filmləri dünyanın müxtəlif ölkələrində mükafatlar qazanıb və Tuluza, Biarrits, Amyen, Zaqreb, Friburq, Monterrey, Huskar, Palm-Sprinqs, Çikaqo, Los-Anceles, Roma, Kartaxena, Havana, Rio-de-Janeyro, Qvadalaxara kimi festivallarda və digər nüfuzlu platformalarda nümayiş etdirilib.

2007-ci ildə rejissor “Pasta” animasiya filmi ilə Çili Milli Mədəniyyət və İncəsənət Şurasının ilin ən yaxşı animasiyası üzrə Pedro Sienna mükafatına layiq görülüb.