Üzeyir Hacıbəylinin ev-muzeyinin fəaliyyətə başlamasının 50 illiyi və Azərbaycan professional musiqi sənətinin banisi, dahi bəstəkar Üzeyir Hacıbəylinin vəfatının 77-ci ildönümü münasibətilə noyabrın 20-də sərgi və tədbir keçirilib.

AZƏRTAC xəbər verir ki, tanınmış mədəniyyət və incəsənət xadimlərinin, ictimaiyyət nümayəndələrinin iştirak etdiyi tədbirdə Üzeyir bəyin zəngin yaradıcılığına dair maraqlı faktlar bölüşülüb, onun Azərbaycan musiqi tarixindəki misilsiz xidmətlərindən bəhs olunub.

Tədbirdə muzeyin direktoru, Xalq artisti Sərdar Fərəcov muzeyin fəaliyyəti, keçdiyi yol, həmçinin dahi bəstəkar Üzeyir Hacıbəylinin həyat və yaradıcılığı barədə məlumat verib.

Qeyd olunub ki, dahi bəstəkar 1915-1942-ci illər bu evdə yaşayıb-yaradıb. Azərbaycan Respublikasının Dövlət Himni burada bəstələnib, “Sənsiz”, “Sevgili canan” kimi bənzərsiz romanslar elə bu evin divarları arasında formalaşıb, “Koroğlu” operası bu mühitdə yazılıb. Bu baxımdan, ev-muzey yalnız bir yaşayış məkanı deyil, milli musiqi tariximizin canlı yaddaşıdır.

Diqqətə çatdırılıb ki, muzey Azərbaycan xalqının Ümummilli Lideri Heydər Əliyevin təşəbbüsü ilə yaradılıb. Muzeyin açılışı 1975-ci il noyabrın 20-də olub.

Tədbir bədii hissə ilə davam edib. Şövkət Ələkbərova adına 20 nömrəli 11 illik Musiqi Məktəbinin şagirdləri konsert proqramı ilə çıxış ediblər.

Sonda qonaqlar muzeyin ekspozisiya zalları ilə tanış olublar.

Qeyd edək ki, muzeyinin fəaliyyətinin 50 illik yubileyinə həsr olunmuş sərgi də öz işinə başlayıb. Sərgi ilin sonunadək ziyarətçilər üçün açıq olacaq.