Məşhur “Disneyland” tematik parkı 17 iyun 1955-ci ildə Los-Ancelesin cənubunda yerləşən Anahaym şəhərində açılıb. Həmin gün amerikalı “animasiya kralı” və uğurlu biznesmen Uolt Disney (Walt Disney) uşaqlar və onların valideynləri üçün möhtəşəm əyləncə parkının təntənəli açılış mərasimini keçirib. Bu tədbir “ABC” kanalı tərəfindən birbaşa yayımlanıb, parkın açılış mərasimini ABŞ-ın gələcək prezidenti aktyor Ronald Reyqan aparıb.

Uşaqlar üçün əyləncə parkının yaradılması ideyası Disney tərəfindən qızları ilə parkda gəzərkən yaranıb. Uşaqlar karuseldə fırlanarkən ataları dükanda oturub gözləyirdi ki, qızları nə vaxt yorulacaq. Bu gəzintilər zamanı Uolt Disney həm uşaqların, həm də valideynlərin yaxşı vaxt keçirə biləcəyi park haqqında fikirləşib.

Əyləncə parkı bütün ailə üçün istirahət yeri olmalıdır və onda Disney belə bir park yaratmaq qərarına gəlib. Lakin tarixçilərin dediyinə görə, İkinci Dünya Müharibəsi Disneyin ideyalarının gerçəkləşməsinə mane olub. Yalnız 1954-cü ildə Anahaymda 32 hektarlıq portağallıqda “Disneyland”in tikintisinə başlanılıb. Bu parkın layihələndirilməsi və inşasına Disneyin özü birbaşa başçılıq edib. O elə bir yer yaratmaq istəyib ki, bütün yaşdan olan insanlar özünü orda uşaq kimi hiss edə bilsinlər.

“The Walt Disney Company” şirkəti tərəfindən ilk “Disneyland”in tikintisinə 17 mln dollar xərclənib, lakin tezliklə bütün yatırımlar 10 dəfə daha çox gəlir gətirib.

Sehrbaz Uolt Disneyin ən böyük arzusu 17 iyul 1955-ci ildə “Disneyland Resort”un qonaqpərvər qapılarını açmaqla reallaşıb. Uolt Disney parkın yaradılmasına ürəyini qoyub. Rəssamın fantaziyası və parkın bütün yaradıcılarının entuziazmı Mikki-Maus və onun dostlarının yaşadığı animasiya filmlərinin və nağılların sehrli dünyasında öz əksini tapıb. Bu tamamilə orijinal və bənzəri olmayan, dörd əsas prinsip üzərində yaradılmış park idi: Uolt Disneyin cizgi filmlərinin sehrli krallığını yenidən qurmaq, cürbəcür və yeni texniki tryukların əlavə olunması, ziyarətçilərdə elə təəssüratlar yaratmaq ki, sanki onlar cəngəlliklər arasında üzür, ya da qarşılarında ruhlar görürlər və ya dənizin dibində sualtı gəmidə oturublar.

Ilk əvvəl attraksionların sayı 16-ya, giriş bileti isə 1 dollara bərabər idi. Hazırda olduğu kimi ziyarətçiləri girişdə Miki Maus, Ağbəniz və Yatmış Gözəl qarşılayır. Daha sonralar onların sırasına Pinokkio və Vinni-Pux da qatılıb.

“Disneyland” tez bir zamanda ABŞ-ın görməli yerlərindən birinə və ailəvi istirahət üçün sevimli məkana çevrilib. Əbəs yerə “Disneyland”i dünyanın ən xoşbəxt yeri saymırlar. Qonaqları Uolt Disneyin səsi salamlayır: “Bizim bu xoşbəxt məkana Xoş Gəlmisiniz! Disneyland sizin ölkənizdir. Burda kamillik yenidən keçmişin ən əziz xatirələrini yaşayır, cavanlıq isə gələcəyin vədləri və çağırışlarından həzz alır. Disneyland Amerikanı yaratmış ideallara, arzu və real faktlara həsr olunub, ümid edirik ki, bu dünya üçün sevinc və ilham mənbəyi olacaq.

“Disneyland”in müasir kompleksi əhəmiyyətli dərəcədə genişlənmiş və 200 hektarlıq sahəni əhatə edir. Park üç hissəyə bölünüb. Birinci zona – simvolu Yatmış Gözəlin Qəsri olan “Disneyland Park”ının özüdür. İkinci zona – 2001-ci ildə açılmış “Disney’s California Adventure Park” tematik parkıdır, bu sahə Qızıl Ştatın tarixinə və mədəniyyətinə həsr olunub və simvolu Kaliforniya canlı təbiətinin rəmzi olan qrizli ayısının siluetini xatırladan süni “Grizzly Peak” dağıdır. Eyni anda “Disney’s California Adventure” ilə birlikdə üçüncü zona – “Downtown Disney” yaradılıb, kompleks bir çox attraksiondan, teatr, 12 zallı kinoteatr, mağaza, restoran, bar və oyun zonalarından ibarətdir.

“Disneyland Resort”un qonaqları Disney studiyasının sevimli animasiya və bədii filmlərinin əsl qəhrəmanları ilə ünsiyyətdə ola və fantastik attraksionlarda əylənə bilərlər. Park gündəlik paradlar və atəşfəşanlıq təşkil edir. “Disneyland”in küçələrində orkestrin müşayiəti ilə Mikki-Maus və Donald Dak digər cizgi filmi qəhrəmanları ilə birlikdə gəzirlər. Parkda hər yerdə monorels, parovoz, fayton və ya funikulyor tapmaq olar. Funikulyordan parkın ərazisinə gözəl mənzərə açılır. “Disneyland”in yaranmasından bu yana onu 500 milyon qonaq, o cümlədən kral ailəsi, prezidentlər və dövlətin digər rəsmiləri ziyarət edib. Disney parklar şəbəkəsi bu günlərdə də genişlənməkdədir, Anahaym şəhərində yerləşən ilk “Disneyland”dan başqa Florida ştatında (ABŞ) “Disneyworld”, Parisdə (Fransa) “Avro-Disneyland”, “Tokio-Disneyland” (Yaponiya) və Honqkonqda (Çin) “Disneyland” fəaliyyət göstərir.