Azərbaycan Respublikası Mədəniyyət Nazirliyinin tabeliyindəki kitabxanalarda tətbiq edilən Koha Avtomatlaşdırılmış Kitabxana İnformasiya Sistemi ilə bağlı treninq məqsədilə Türkiyənin Mədəniyyət və Turizm Nazirliyinin Kitabxanalar və Yayımlar Baş İdarəsinin Texniki Xidmətlər şöbəsinin müdir vəkili İsmail Karaca, şöbənin əməkdaşı Ferhat Öztürk və Proqram təminatı və tətbiqinin inkişafı şöbəsinin İT mütəxəssisi Muhittin Enes Kale Azərbaycan Milli Kitabxanasına dəvət olunublar.

Bu barədə AZƏRTAC-a Milli Kitabxanadan məlumat verilib.

Treninqdə çıxış edən Milli Kitabxananın direktoru professor Kərim Tahirov bildirib ki, Koha Avtomatlaşdırılmış Kitabxana İnformasiya Sisteminin kitabxanalarda tətbiqi artıq üç ildir həyata keçirilir və üstün cəhətləri ilə kitabxanalara əlaqəli şəkildə işləmək imkanı yaradır. O qeyd edib ki, yeni sistemə keçidlə əlaqədar hər zaman problemlər yarana bilir və Türkiyədən dəvət edilən mütəxəssislərlə təcrübi xarakter daşıyacaq treninqlərdə də məqsəd məhz qarşıya çıxan problemlərin birgə həllidir. O, 10 gün davam edəcək treninqlərdə iştirak edən əməkdaşları mütəxəssislərin təcrübələrindən yararlanmağa dəvət edib.

Mədəniyyət Nazirliyinin Kitab sənayesi şöbəsinin müdiri Vasif Qurbanzadə sistemin Azərbaycan Respublikası Mədəniyyət Nazirliyinin tabeliyindəki kütləvi kitabxanalarda tətbiqindən, sistemdə iş proseslərinin inkişafından və mövcud problemlərin aradan qaldırılması istiqamətində görülən işlərdən danışıb, iştirakçılara uğurlar arzulayıb.

Qeyd edək ki, treninqlərdə F.Köçərli adına Respublika Uşaq Kitabxanası,C.Cabbarlı adına Respublika Gənclər Kitabxanası və Bakı Şəhər Mədəniyyət Baş İdarəsinin tabeliyində olan Nərimanov, Xətai, Səbail, Yasamal, Qaradağ, Binəqədi, Xəzər, Nəsimi, Suraxanı, Nizami, Sabunçu rayon Mərkəzləşdirilmiş Kitabxana Sistemləri, M.Ə.Sabir adına Şəhər Kütləvi Kitabxanasından əməkdaşlar iştirak ediblər.