Noyabrın 19-da Beynəlxalq Muğam Mərkəzində Türk Mədəniyyəti və İrsi Fondunun təşkilatçılığı və Azərbaycan Respublikası Mədəniyyət Nazirliyinin dəstəyi ilə Şanlı Zəfərin 5-ci ildönümünə həsr olunmuş ədəbi-bədii tədbir və miniatür sənətinin incəliklərini əks etdirən “Kölgəsiz dünya” adlı sənədli filmin təqdimat mərasimi keçirilib.

AZƏRTAC xəbər verir ki, əvvəlcə Azərbaycan Respublikasının Dövlət Himni səsləndirilib. Şəhidlərimizin əziz xatirəsi bir dəqiqəlik sükutla yad edilib.

Tədbirdə Azərbaycanda akkreditə olunmuş diplomatik korpusun və beynəlxalq təşkilatların nümayəndələri, Milli Məclisin deputatları, elm və mədəniyyət xadimləri iştirak ediblər.

Tədbirdə çıxış edən Türk Mədəniyyəti və İrsi Fondunun prezidenti Aktotı Raimkulova bildirib ki, bu gün Azərbaycan xalqının qüdrətinin, birliyinin və sarsılmaz iradəsinin rəmzinə çevrilmiş Şanlı Zəfərin 5 illiyi münasibətilə ədəbi-bədii tədbir təşkil olunub. O, həmçinin türk incəsənətinin ən zərif sahələrindən biri olan miniatür sənətinə həsr olunmuş "Kölgəsiz dünya" sənədli filminin önəmindən danışıb: “Türk Mədəniyyəti və İrsi Fondu üçün miniatür sənətinin yaşadılması, öyrənilməsi və tanıdılması, Türk dünyasının ümumi mədəni irsinin qorunması baxımından mühüm əhəmiyyət daşıyır. Miniatürlər tarixi dövrlərin canlı əksi, rəngin, xəttin və obrazın sözsüz danışdığı vizual poeziyadır. Bu filmin ərsəyə gəlməsində Fondun birinci prezidenti olmuş, Milli Məclisin deputatı Günay Əfəndiyevanın rolu xüsusi qeyd olunmalıdır”.

Sonra tədbirdə müxtəlif musiqi və bədii çıxışlardan ibarət proqram təqdim olunub. Əməkdar artist Bəyimxanım Vəliyeva “Xudayar təsnifi”ni, gənc müğənni Xasay Şıxıyev “Ey vətən” mahnısını, tanınmış xanəndə Ayşən Mehdiyeva isə “Qarabağ” şərqisini ifa ediblər. Ramiz Qusarçaylının “Azərbaycan bayrağı” şeirini isə aktyor Tural Əhməd səsləndirib. Həmçinin 3 nömrəli Uşaq-Gənclər İnkişaf Mərkəzinin rəqs qrupunun çıxışı nümayiş olunub.

Bakı Dövlət Universitetinin Fəlsəfə tarixi və mədəniyyətşünaslıq kafedrasının müdiri professor Rəbiyyət Aslanova çıxışında Türk Mədəniyyəti və İrsi Fondu tərəfindən hazırlanmış “Kölgəsiz dünya” sənədli filminin əhəmiyyətindən bəhs edib. O bildirib ki, bu film miniatür sənətini geniş auditoriyaya tanıtmaqla yanaşı, Azərbaycan mədəni irsinin zənginliyini və estetik dəyərini göstərən vacib layihədir. O qeyd edib ki, film vasitəsilə həm gənc nəsillər, həm də geniş ictimaiyyət miniatür sənətinin incəliklərini daha dərindən anlaya və qiymətləndirə bilər.

Rəbiyyət Aslanovanın sözlərinə görə, bu sənət yalnız vizual gözəllikdən ibarət deyil, həm də dərin mənəvi və tarixi mesajlar daşıyır. Hər kəs miniatürü fərqli şəkildə qavrayır, onu öz baxış bucağı, təcrübəsi və duyğuları ilə mənalandırır. Beləliklə, miniatür həm fərdi təcrübənin, həm də kollektiv mədəni irsin əks olunmasına xidmət edən unikal sənət formasıdır.

Daha sonra miniatür sənətinə həsr olunmuş “Kölgəsiz dünya” adlı sənədli film nümayiş edilib. Filmin çəkilməsində məqsəd miniatür sənətinin incəliklərini geniş kütləyə çatdırmaq, bu unikal sənət forması vasitəsilə tarixi və mədəni dəyərləri izah etməkdir.

Filmin müəllifləri “Artel” şirkətinin art direktorları Cəmilə Həşimova və Afaq Məmmədovadır.

44 günlük Vətən müharibəsində qazanılmış Şanlı Qələbənin beşinci ildönümünə həsr olunmuş bu tədbirdə Türk Mədəniyyəti və İrsi Fondu tarixi günü qeyd edərək Vətən müharibəsində həyatını itirmiş qəhrəmanlarımızı və qazilərimizi dərin ehtiramla anır.