Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin Mərkəzi Kitabxanasının fəxri oxucusu, uşaq yazıçısı, Azərbaycan Yazıçılar Birliyinin üzvü, Prezident təqaüdçüsü, H.Zərdabi mükafatçısı Gülzar İbrahimova “Olmasın müharibə” şeirini təqdim edib.

Uşaqların sevimli Gülzar nənəsi bu şeiri qarşıdan gələn 1 iyun- Uşaqların Beynəlxalq Müdafiəsi Gününə həsr edib. O, hər il  uşaqlar üçün Sülhə aid yeni şeir hazırlayır. “Sülh nəğməsi”, “Sülhə salam” və “Sülh gəmisi” şeirlərini də bayram ərəfəsində hədiyyə edib.

Yazıçı qələmindən çıxan bütün şeirlər sadə dildə yazıldığından uşaqlar onu tez əzbərləyə bilir.

Ənənəsinə sadiq qalan Gülzar İbrahimovanın yeni yazdığı şeirində məna əvvəlkilərlə eyni olsa da, mətni əvvəlki şeirlərdən fərqlidir. O daha təsirlidir. Çünki bu şeirdə son müharibənin acısı da var..

Şeirin hər bəndində məna var: Həm şəhidləri yada salır, həm şəhid anasının kövrək qəlbindən xəbər verir. Şeir elə məharətlə, elə sadəliklə qələmə alınıb ki, həm uşaqlara, həm də böyüklərə eyni təsir gücündədir. Ölümdür müharibə! O haqlı, haqsız bilmir, O cavan, qoca bilmir, uşağa rəhmi gəlmir...  Məhv edir arzuları… Yox edir canlıları.. Yaxşını da öldürür, Yamanı da...

Yer üzünün bütün yaxşı insanlarının arzusudur bu: “Olmasın müharibə”. Yazıçının arzusuna qoşuluruq, müharibəyə “YOX” deyirik! Qoy bir daha müharibə olmasın!