Ramiz Qəvvam oğlu Novruz 25 may 1955-ci ildə Biləsuvar rayonunun Səmədabad qəsəbəsində anadan olub.

1974-cü ildə M.Əliyev adına Azərbaycan Dövlət İncəsənət İnstitutunun Dram və kino aktyorluğu fakültəsinə daxil olub. Rejissor Adil İsgəndərovun rəhbərlik etdiyi kursda dörd il təhsil alaraq oranı 1978-ci ildə bitirib. Təyinatla H.Ərəblinski adına Sumqayıt Dövlət Dram Teatrına göndərilib. Gənc aktyor burada Knyaz Zvezdiç ("Maskarad", M.Lermontov), Məsxərəçi ("Muradın kələkləri", T.Kazımov), General Şıxlinski ("Bütün Şərq bilsin", N.Həsənzadə) rollarını ifa edib.

O, 1981-ci ildə Akademik Milli Dram Teatrının truppasına qəbul olunub. Elə ilk günlərdən kollektivdə hazırlanan tamaşalarda ona irihəcmli və mürəkkəb xarakterli rollar tapşırılıb.

İlk böyük rolu rejissor Əşrəf Quliyevin tamaşaya qoyduğu A. Safronovun "Gecənin sirri" tamaşasında polkovnik Lebedev (1981) olub. Mayor Edmund, Məhəmməd Suvarlı, ("Şeyx Xiyabani", "Sevgililərin cəhənnəmdə vüsalı", İ.Əfəndiyev), Seyton, Edmund ("Maqbet", "Kral Lir", V.Şekspir), Kreon ("Medeya", J.Anuy), İbn Yəmin ("İblis", H.Cavid), Loğman. Laçın ("Fəryad", "Hara gedir bu dünya?", B.Vahabzadə), Fərhad ("Sənsiz", Ş.Qurbanov), Baş redaktor ("Mənim sevimli dəlim", Elçin), Pompey ("Pompeyin Qafqaz yürüşü", N.Həsənzadə), müəllifi olduğu "Hələ "sevirəm" deməmişdilər…" pyesində Andranik və Nostradamus, Ələs bəy ("Dirilən adam", Mir Cəlal), Qaçaq Süleyman ("Ölüləri qəbiristanlıqda basdırın", İ.Şıxlı), Murad ("Xəcalət", H.Mirələmov) obrazlarına səhnə həyatı verib.

Saqarelinin "Xanuma" tamaşasında Knyaz (rej. M.Mikayılov), Sartrın "Dəfn olunmayan ölülər" tamaşasında Anri (rej. Mehriban Ələkbərzadə), Dürremantın "Yaşlı xanımın gəlişi" əsərində (rej. R. Almuradlı) Alfred və İl, G.Ömərovun rejissoru olduğu Yunus Oğuzun "Nadir Şah" əsərində Nadir Şah, M.Mikayılovun tamaşaya qoyduğu  "Müfəttiş" əsərində Bələdiyyə rəisi, Müfəttiş, Azər Paşa Nemətovun tamaşaya qoyduğu "Boy çiçəyi" əsərində Həzənzadə rollarını uğurla ifa edib.

R.Novruzun yaradıcılığının bir qolunu kino fəaliyyəti təşkil edir. İstedadlı aktyor "Sizi dünyalar qədər sevirdim" filmində general Həzi Aslanov, "Cavad xan" filmində general Sisyanov və s. rollara çəkilib. R.İsmayılovun "Alman klinikasına qeyri-rəsmi səfər" (1988-89) əsərində Baba Əliyev, Yavər Rzayevin "Sarı gəlin" əsərində Rasim, Ramiz Həsənoğlunun "Cavid ömrü" filmində Mir Cəfər Bağırov obrazlarını uğurla canlandırıb. Rusiyanın RTR kanalında Vadim Ostrovskinin çəkdiyi 4 seriyalı "Sui-qəsd" (Покушение) filmində əsas rollardan birini - çeçen komandiri rolu, Samir Kərimoğlunun "Şər qarışanda" filmində Fərrux rolu da Xalq artistinin uğurlu rolları siyahısındadır. Bundan başqa R.Novruz Rövşən İsaxın "Pərvanələrin rəqsi" və "Sonuncu fəsil" seriallarında Hikmət Bədirli və Xanlar obrazlarını uğurla canlandırıb. Rejissor A.Zamanlının S.Behrənginin "Balaca qara  balıq" hekayəsinə tamaşaya qoyduğu monotamaşanı da özünəməxsus tərzdə ifa edib. 5 il "Mən Azərbaycanlıyam" verilişinin uğurlu aparıcısı olub.

Aktyorun L.Tolstoyun "Kreyser sonatası" (Musiqi müəllimi), V.Şekspirin "Antonio və Kleopatra" (Antonio), Orxan Kamalın "Yad qızı" (Nihad) və s. ifaları da tamaşaçı rəğbətini qazanıb.

1996-cı ildə yazdığı "Hələ "sevirəm" deməmişdilər…" pyesi B.Osmanovun rejissorluğu ilə Azərbaycan Dövlət Akademik Milli Dram Teatrında 2002-ci ildə tamaşaya qoyulub. Bundan əlavə E. de Filipponun "Silindr" əsərini rus dilindən Azərbaycan dilinə tərcümə edib və rejissor kimi ugurla tamaşaya qoyub, həmçinin bu əsərdə Atilio rolunu oynayıb.

Ramiz Novruz bir çox beynəlxalq teatr festivallarında uğurla iştirak edərək mükafatlandırılıb.

Teatr sənətindəki xidmətlərinə görə Ramiz Novruz 1993-cü ildə "Azərbaycan Respublikasının Əməkdar artisti" və 1998-ci ildə "Xalq artisti" fəxri adlarına layiq görülüb.

Ramiz Novruz uzun müddət mədə xərçəngi xəstəliyindən əziyyət çəkirdi və 20 fevral 2023-cü il tarixində vəfat edib.