Seyidağa Mircabbar oğlu Həbibov 1919-cu il oktyabrın 26-da Bakının Maştağa kəndində dünyaya göz açıb və ailənin yeganə övladı olub. O, əvvəlcə Cəfər Cabbarlı adına 187 nömrəli tam orta məktəbdə bir neçə il oxuyub, sonra təhsilini Bakıdakı Bədəl bəy adına orta məktəbdə davam etdirib. Orta məktəbi bitirdikdən sonra 1937-ci ildə N.Nərimanov adına Azərbaycan Tibb İnstitutuna daxil olub, 3-cü kursdan təhsilini yarımçıq qoyub və 1940-cı ildə Azərbaycan Sənaye İnstitutuna (indi Azərbaycan Dövlət Neft və Sənaye Universiteti) daxil olub.

1941-ci ildə II Dünya müharibəsinin başlanması səbəbindən Seyidağa təhsilini yarımçıq qoyub və yaşıdları kimi ordu sıralarına qoşulub, ön cəbhəyə gedib və döyüşlərdə tankçı kimi iştirak edib. O, 1943-cü ildə Mozdok rayonu ətrafında gedən şiddətli döyüşlərdə ağır yaralandıqdan sonra arxa cəbhədə xidmət etməyə göndərilib. Seyidağa 1945-ci ildə müharibə bitdikdən sonra yarımçıq qalmış təhsilini davam etdirib və 1950-ci ildə neft mütəxəssisi kimi ali təhsil alıb.

O, əmək fəaliyyətinə öncə Bakının Ramana kəndinin neft mədənlərində neftçıxarma ustası kimi başlayıb. Daha sonra Buzovna neft mədənlərində baş mühəndis, Qaz kontorunun rəisi və “Buzovnaneft”də mədən müdiri kimi məsul vəzifələrdə çalışıb. Seyidağa ona tapşırılan bütün vəzifələrin öhdəsindən bacarıqla gəlib, özünü istedadlı, səriştəli təşkilatçı kimi tanıdıb. Onun neftçıxartma sahəsində göstərdiyi xidmətlər dövlətimiz tərəfindən layiqincə qiymətləndirilib, müxtəlif medallar və fəxri fərmanlarla təltif olunub.

El arasında “İnjener Seyidağa” kimi tanınmış şair 1987-ci il iyun ayının 1-də vəfat edib.