Sevil Qazıyeva 1940-cı il iyunun 1-də Zaqatala rayonunda anadan olub. Atası müharibədən qayıdandan sonra necə yaralandığını, tibb bacılarının döyüşçülərin yaralarını necə sarıdığını danışanda Sevildə həkim olmaq həvəsi yaranıb. 1958-ci ildə orta məktəbi bitirən Sevil sənədlərini indiki Azərbaycan Dövlət Tibb Universitetinə versə də, müsabiqədən keçə bilmir. Bir gün qarşısına qızlar üçün sənət məktəbi açıldığı barədə elan çıxır. Bundan sonra Sevil həmin məktəbin “Poliqrafiya” ixtisasında təhsil alır. Özbək qızı Tursunoy Axunovanın maşınla pambıq yığımında göstərdiyi hünər barədə oxuduğu məqalə onun həyatını birdəfəlik dəyişir. O, sürücü mexanik olmağa qərar verir.

Özbək qızının “Qızlar, sükan arxasına!” hərəkatına ilk səs verənlərdən biri Sevil Qazıyeva olub. Üç rəfiqə-Məmləkət, Solmaz və Diləfruz Sevilə qoşulub, Mərkəzi Komitəyə gedib. Onların “Niyə azərbaycanlı qız maşınla pambıq yığmasın?” tələbi nəzərə alınıb. Bir müddət sonra Binədəki kənd təsərrüfatını mexanikləşdirmə məktəbində sürücü-mexanik hazırlayan kurs açılıb. Kursa ilk yazılanlar da bu rəfiqələr olub. Onların ardınca 58 qız məktəbə sənəd verib. Sevil Qazıyeva Binədəki kənd təsərrüfatını mexanikləşdirmə məktəbini bitirəndən sonra könüllü şəkildə Beyləqan rayonuna işləməyə gedib. İstehsalat təcrübəsi zamanı Sevil maşınla 97 ton pambıq yığıb. Təcrübəsi olmayan bir qız üçün bu, yaxşı göstərici idi. Bu qələbə təkcə maşınla yığımın müvəffəqiyyəti yox, həm də “maşın qız işi deyil” deyənlərin üzərində qələbə olub.

Sevil qızlar klubu açıb, gənc xanımları özfəaliyyət dərnəyinə toplayıb. 1961-ci ildə Özbəkistanda sovet pambıqçılarının toplantısında Azərbaycan nümayəndə heyətinin tərkibində Sevil Qazıyeva da iştirak edib. Sevil Özbəkistanda olarkən məşhur sovet pambıqçısı Tursunoy Axunovanın iş təcrübəsi ilə yaxından tanış olur. O, Daşkənddən qayıtdıqdan sonra Beyləqanda Axunova kimi kompleks-briqada yaradıb və həmin briqadaya başçılıq edib. 1962-ci ildə Azərbaycan Kənd Təsərrüfatı İnstitutunun mexanizasiya fakültəsinə daxil olan Sevil Qazıyeva işləyə-işləyə həm də qiyabi təhsil alıb. Qısa müddət ərzində Azərbaycanın adlı-sanlı pambıqçılarından birinə çevrilən Sevil Qazıyeva 1962-ci ildə öz maşını ilə 190 ton pambıq yığıb. Daha sonra o “Qırmızı Əmək Bayrağı” ordeni ilə təltif edilib.

Sevil əmək cəbhəsində Sərdar İmrəliyevlə yarışıb. Hər ikisi “Əməkdar mexanizator” adını alıb, birgə kompleks pambıqçılıq briqadası yaradıb. Pambığı özləri əkib, becərib, özləri də yığıb.

Sevil xanım 1963-cü ildə Azərbaycan SSR Ali Sovetinin deputatı seçilib. Deputat seçilməsi Sevilin qayğılarını daha da artırıb. O, eyni vaxtda həm başçılıq etdiyi briqadanın işlərinə nəzarət edib, həm də seçicilərinin problemləri ilə məşğul olub. Tələbə-deputat boş vaxtlarında isə imtahanlara hazırlaşıb. Onun çağırışı ilə 600 nəfərdən çox qız mexanizator peşəsini seçib.

Onun böyük planları arzuları, olub. Lakin 1963-cü il sentyabrın 27-də Sevil Qazıyeva ömrünün bahar çağında, faciəli şəkildə vəfat edib. Bir gün axşamüstü,sahələrdən dəstə-dəstə qayıdan pambıqçılardan yarışdığı briqadirin ondan bir bunker çox pambıq yığdığını öyrənən Sevil yenidən tarlaya qayıdıb. Amma onun ölümü haqqında yayılan xəbər hamını sarsıdır. Kənd camaatı gözlərinə inana bilmir: O, idarə etdiyi kombaynın çarxlarını təmizləmək üçün əyiləndə motoru söndürməyi unutduğundan saçları çarxlara ilişib. Maşın onun başının dərisini tamam qoparıb. Həmişə sevərək oxşadığı saçları Sevili ölümə sürükləyib. Sevilin qatili hörükləri olub.

Ölümündən 3 il sonra Sevil Qazıyevaya Sosialist Əməyi Qəhrəmanı adı verilib. Yaşadığı ev 1986-cı ildə muzeyə çevrilib. Sevil Qazıyeva cəmi 23 il ömür yaşasa da, Azərbaycan tarixinə adını qızıl hərflərlə yazdırıb.