AZƏRTAC xəbər verir ki, jurnalın baş redaktoru Musa Mərcanlı ənənəvi redaktor sütununda oxuculara müraciət edib. O xatırladıb ki, başa çatmaqda olan il Azərbaycanda rəsmən “Şuşa İli” elan edilib, buna görə də ölkəmizin mədəni paytaxtı ilə bağlı olan müxtəlif səviyyəli tədbirlərlə zəngin olub.

Musa Mərcanlı yazır: “Azərbaycan və dünya elminə, mədəniyyətinə bu qədər çoxsaylı simalar bəxş etmiş başqa bir şəhər tapmaq çətindir. Təsadüfi deyil ki, Şuşa şəhəri rəsmən Azərbaycanın mədəniyyət paytaxtı adı alıb və üstəlik, 2023-cü ildə Türk dünyasının mədəniyyət paytaxtı elan edilib. Daha bir mühüm fakt ondan ibarətdir ki, 28 ildən artıq erməni işğalında olmuş Şuşa iki il bundan əvvəl işğaldan azad edilib və indi həm Azərbaycan dövlətinin, həm də ölkə ictimaiyyətinin diqqət mərkəzindədir. Burada işğalın nəticələrinin aradan qaldırılmasına, əvvəlki mədəni ənənələrin dirçəldilməsinə yönəlmiş fəal iş aparılır”.

Jurnalın yeni nömrəsində 1990-cı il 20 Yanvar hadisələri barədə material təqdim edilib. Bu materialda Qara Yanvar Azərbaycan xalqının tarixində faciəli, lakin şanlı bir səhifə kimi səciyyələnir. Haqsızlığa, ədalətsizliyə qarşı çıxış edən Azərbaycan xalqı qanlı cəza aksiyası ilə üzləşdi, lakin onun əzmini qıra bilmədilər.

Jurnalda Azərbaycanın İkinci Qarabağ müharibəsində Qələbəsinə həsr edilmiş materiallar da təqdim olunub.

Fəridə Abdullayeva

AZƏRTAC-ın xüsusi müxbiri

Moskva