Azərbaycan Dövlət Pantomim Teatrında görkəmli rus ədibi Nikolay Vasilyeviç Qoqolun eyniadlı əsəri əsasında hazırlanmış “Müfəttiş” tamaşasının premyerası olub.

Səhnə əsərinin quruluşçu rejissoru, plastik həll və rəqslərin quruluşçusu Ceyhun Dadaşov, rəssamı Xəyyam Səmədov, butafor üzrə rəssamı Sənubər Səmədovadır.

Özündə sözlə yanaşı rəqs, pantomim, akrobatika elementlərini birləşdirən tamaşada Nurlan Rüstəmov (Anton Antonoviç), Əli Əlizadə (Xlestakov), Əməkdar artist Bəhruz Vaqifoğlu (Ammos Fyodroviç), Emin Qiyaslı (Artemi Flippoviç), Elxan Şahaliyev (Luka Lukiç), Solmaz Bədəlova, Zəhra Hüseynova (Anna Andreyevna), Səbirə Həsənova, Jalə Novruzova (Marya Antonovna), Cavad Nuriyev, Nurlan Süleymanlı (Bobçinski), Elnur İsmayılov, Hilal Dəmirov (Dobçinski), Oqtay Kazımov (Osip) və Rafael Şahbəyli (poçt müdiri) rol alıblar.

90 dəqiqəlik səhnə əsərində ənənəvi yozumdan imtina edilərək, baş verənlərin təsadüfdən daha çox Osipin düşünülmüş hərəkətləri və dəqiq zamanda verdiyi qərarları ilə bağlı olduğu ön plana çıxarılıb. Rejissor bütün bu eybəcərliklər içində təmizliyin ola biləcəyini Marya Antonovnanın timsalında, az da olsa, göstərə bilib.

Səhnə əsəri tamaşaçılar tərəfindən alqışlarla qarşılanıb.