Dekabrın 2–3-də Milli Azərbaycan Tarixi Muzeyində muzeyin yaradılmasının 105 illiyinə həsr olunmuş “Tarixin öyrənilməsinin və tədrisinin aktual problemləri” mövzusunda respublika elmi konfransı keçirilib.

Konfransdan əvvəl iştirakçılar “Milli Azərbaycan Tarixi Muzeyinin kolleksiyasındakı xəritələrdə Qərbi Azərbaycan toponimləri” adlı sərgi ilə tanış olublar. Açılış mərasimi Azərbaycan Respublikasının Dövlət Himninin səsləndirilməsi ilə başlayıb.

Tədbirin açılışında çıxış edən Milli Azərbaycan Tarixi Muzeyinin direktoru, akademik Nailə Vəlixanlı muzeyin yarandığı gündən etibarən elmi-tədqiqat və maarifçilik fəaliyyəti ilə Vətən tarixinin öyrənilməsi və təbliğində mühüm rol oynadığını vurğulayıb və elmi konfransın əhəmiyyətindən bəhs edib.

İki gün davam edən konfransda Bakı, Naxçıvan və Gəncə şəhərlərindən olan ümumilikdə 35 alim iştirak edib. Məruzələrdə Azərbaycan tarixinin dövrləşdirilməsi, tarixi mənbələrin tədqiqi, xalqımızın etnogenezi məsələləri, tarixin tədrisi və muzeylərin tarixi təhsildə rolu kimi aktual mövzular ətrafında geniş fikir mübadiləsi aparılıb.