Azərbaycan Bəstəkarlar İttifaqında görkəmli bəstəkar, Azərbaycan və SSRİ Xalq artisti, akademik Arif Məlikovun anadan olmasının 90 illiyinə həsr olunmuş elmi-praktiki konfrans keçirildi.

AZƏRTAC xəbər verir ki, tədbirdə giriş sözü ilə Bəstəkarlar İttifaqının katibi, Əməkdar incəsənət xadimi Zemfira Qafarova çıxış edərək Arif Məlikovun Azərbaycan musiqi mədəniyyətinin inkişafındakı müstəsna əhəmiyyətindən danışdı. O qeyd etdi ki, görkəmli bəstəkarımız Qara Qarayev məktəbinin layiqli davamçısı olan Arif Məlikovun yaradıcılığında xalqımızın tarixi, milli ənənələri, klassik poeziya nümunələri musiqinin müxtəlif janrlarında dolğun ifadə vasitələri ilə tərənnüm olunub. Arif Məlikovun zəngin yaradıcılıq irsinə 8 simfoniya, simfonik poemalar, orkestr süitaları, vokal-simfonik, kamera-instrumental əsərləri, kino və dram tamaşalarına yazılmış musiqi və s. daxildir. Bu əsərlər içərisində bəstəkarın dünyanın müxtəlif səhnələrində tamaşaya qoyulan “Məhəbbət əfsanəsi” baleti tutur.

Arif Məlikovun yaradıcılığında onun pedaqoji və ictimai fəaliyyəti də xüsusi qeyd olunmalıdır. Çünki o uzun illər Üzeyir Hacıbəyli adına Bakı Musiqi Akademiyasında (BMA) kafedra müdiri olaraq musiqi mədəniyyətimizin inkişafına xidmət edib.

Konfransda Arif Məlikovun tələbələri olan bəstəkarların, musiqişünasların maraqlı məruzələri dinlənilib. Musiqişünas, Əməkdar incəsənət xadimi, sənətşünaslıq üzrə elmlər doktoru, professor İmruz Əfəndiyeva “Xatirələrdə yaşayan böyük bəstəkar və musiqi ictimai xadim”, Əməkdar müəllim, bəstəkar Lalə Cəfərova “Arif Məlikovun balet yaradıcılığı”, bəstəkar, sənətşünaslıq üzrə fəlsəfə doktoru, dosent Pikə Axundova “Arif Məlikovun simfonik musiqisi”, sənətşünaslıq üzrə fəlsəfə doktoru, dosent Aytən İbrahimova “Arif Məlikovun kamera-vokal əsərləri”, Əməkdar müəllim, sənətşünaslıq üzrə fəlsəfə doktoru, dosent Arzu Məmmədova “Arif Məlikov haqqında xatirələrim” adlı məruzələrlə çıxış ediblər.

Tədbirin musiqi hissəsində bəstəkarın kamera əsərləri səsləndi. Proqrama Nazim Hikmətin sözlərinə yazılmış vokal silsilədən 5 romans (Əməkdar artist Nərgiz Kərimova – soprano, konsertmeyster – Svetlana Əhmədova), fleyta və fortepiano üçün “Konsertino” (Beynəlxalq müsabiqə laureatı Nərgiz Əliyeva – fleyta, Zərif Kərimova - fortepiano), “Məhəbbət əfsanəsi” baletindən “Qızların rəqsi” kanon və fortepiano üçün işləmələri (Rəna Mirağayeva - kanon, Sevinc Kərimova- fortepiano) daxil idi.

Sonda Arif Məlikovun qardaşı qızı, Əməkdar artist, Ü.Hacıbəyli adına BMA-nın baş müəllimi Nigar Məlikova tədbirin təşkilinə görə Azərbaycan Bəstəkarlar İttifaqına dərin minnətdarlığını bildirib.