Anar Məmmədxanov 20 iyul 1970-ci ildə Bakı şəhərində anadan olub. 1987-ci ildə 160 nömrəli orta məktəbi bitirib və Bakı Dövlət Universitetinin mexanika-riyaziyyat fakültəsinə daxil olub, 1992-ci ildə oranı bitirib.

1988-ci ildə məşhur “Bakılı oğlanlar” Şən və Hazırcavablar Klubunu yaradıb. Onun rəhbərliyi ilə komanda 1992-ci ildə ŞHK-nun Ali Liqasının Çempionu, 1993-cü ildə Ali Liqanın finalçısı, 1995-ci ildə ŞHK-nin Yay Kubokunun sahibi, 2000-ci ildə isə XX əsrin 10 ən yaxşı komandasının yarışmasının çempionu olub. 

Anar Məmmədxanov Avrasiya Radio və Televiziya Akademiyasının üzvü idi.

Bitərəf kimi Azərbaycan Respublikası birinci (1995), ikinci (2000) və üçüncü çağırış (2005) Milli Məclisinin deputatı seçilib. “Ultra Production” şirkətinin və “Day.az” xəbər saytının yaradıcısı idi.

23 aprel 2011-ci ildə qəflətən dünyasını dəyişən Anar Məmmədxanov xatirələrdə əbədi iz qoyub. Həm “Bakılı oğlanlar” Şən və Hazırcavablar Klubunun əfsanəvi kapitanı kimi, həm Milli Məclisin ən gənc millət vəkili kimi, həm də sadəcə gülərüz, sözü ilə ürəyi bir olan, insanları və həyatı həddindən artıq sevən əsl VƏTƏNDAŞ Anar Məmmədxanov kimi.

Anar Məmmədxanovun 3 övladı yadigar qalıb. 2018-ci ildə onun haqqında Əməkdar jurnalist, yazıçı-publisist Elmira Axundova “Anar Məmmədxanov. Kapitanın taleyi” kitabını yazıb. Kitabda Anar Məmmədxanovu tanıyan 100-ə yaxın şəxsin xatirələri yer alıb.