Vəfa Nüsrət qızı Fətullayeva 25 avqust 1945-ci ildə Bakıda görkəmli teatr xadimləri Hökumə Qurbanovanın və Nüsrət Fətullayevin ailəsində dünyaya gəlib. Vəfa Fətullayeva 1964-cü ildə Bakıda 1 saylı orta məktəbi bitirib. 1966-cı ildə Mirzağa Əliyev adına Azərbaycan Dövlət Teatr İnstitutunun (indiki ADMİU) rejissorluq fakültəsinə daxil olub. İkinci kursda ixtisasını dəyişərək teatrşünaslıq fakültəsinə keçib. 1971-ci ildə teatrşünas diplomunu alıb.

Səhnəyə ilk dəfə 1955-ci ildə Uilyam Şekspirin “Qış nağılı” dramının tamaşasında Mamili oğlan rolunda çıxıb. Teatrşünaslıq fakültəsinin dördüncü kursunda oxuyanda rejissor Tofiq Kazımovun dəvəti ilə 1969-cu ildə Akademik Milli Dram Teatrında İlyas Əfəndiyevin “Məhv olmuş gündəliklər” tamaşasında baş qəhrəmanı Fəridəni ifa edib. O, Fəridəni ki, illər ötsə də tamaşaçı qəlbində iz salıb və Vəfa xanımın adı gələndə ilk növbədə məhz bu obraz yada düşür.

1970-ci ildən Akademik Milli Dram Teatrının ştatına aktrisa götürülüb. Hüseyn Cavidin “İblis” faciəsinin tamaşasındakı Rəna roluna görə 1984-cü ildə Azərbaycan Dövlət mükafatına layiq görülüb. 1982-ci ildə “Əməkdar artist” fəxri adı ilə təltif edilib.

Dərin, mənalı baxışları həyat eşqi ilə dolu olan Vəfa Fətullayeva özü bir obraz idi. Onun görkəmi ilə istedadı elə bir ahəng yaradırdı ki, ifa etdiyi irili-xırdalı rollar qeyri-iradi baş qəhrəman səviyyəsinə yüksəlirdi: Şərəfnisə (“Müsyö Jordan və dərviş Məstəli şah”, Mirzə Fətəli Axundzadə), Bənövşə (“Kəndçi qızı”, Mirzə İbrahimov), Gülgəz (“Mahnı dağlarda qaldı”, İlyas Əfəndiyev), Veroçka (“Sevgi... sevgi...”, Emil Braginski və Eldar Ryazanov), Beatriçe (“Heç nədən hay-küy”, Uilyam Şekspir), Xəyalə, Pakizə, Tənzilə (“Əks-səda”, “Mirzə Şəfi” və “Sən yanmasan...”, Nəbi Xəzri), Qız, Şirin (“Şöhrət və ya unudulan adam” və “Məhəbbət əfsanəsi”, Nazim Hikmət), Gülnar və Xuraman, Dildar (“Vaqif” və “İnsan”, Səməd Vurğun), Qadın (“Karıxmış sultan”, Taufıq əl Hakimi), Arzu, Göyərçin, (“Kimdir haqlı?” və “Yollara iz düşür”, Bəxtiyar Vahabzadə), Zeynəb (“Sizi deyib gəlmişəm”, Anar), İnanc xatun (“Atabəylər”, Nəriman Həsənzadə), Nataşa (“Həyatın dibində”, Maksim Qorki) – müxtəlif səpkili, komik və faciəvi rolları eyni ustalıqla yaşatmaq, gah şıltaq, gah kədərli, gah şaqraq gülüşləri ilə tamaşaçını da aktyora çevirmək və bu hissi yaşatmaq, qüssələndikdə belə həyat eşqini alovlandırmaq Vəfa xanıma xas olan xüsusi bir bacarıq idi. Məhz bu keyfiyyətlərin sayəsində o tamaşaçının qəlbində əbədi məskən sala bilib.

Vəfa Fətullayeva İlyas Əfəndiyevin “Atayevlər ailəsi” (Lətafət), İslam Səfərlinin “Göz həkimi” (İradə) televiziya tamaşalarında da çıxış edib.

“Azərbaycanfilm”də istehsal olunmuş “Firəngiz” (Firəngiz) bədii filminə çəkilib.

Vəfa Fətullayeva 1987-ci il may ayının 21-də Bakıda vəfat edib.