CBC Azərbaycan beynəlxalq teleşirkətinin “Azərbaycan ərazisində Türk damğaları” sənədli filmi Berlində keçirilən Almaniyanın ORION Beynəlxalq Film Festivalının finalçısı olub.

AZƏRTAC xəbər verir ki, sənədli film Azərbaycanın nadir mədəni irsinə-türk damğalarına, türk xalqlarının tarixində mühüm rol oynayan qədim tayfa kimlik əlamətlərinə həsr olunub. Ölkə boyu səpələnmiş bu rəmzlər əcdadlarımızın irsinin canlı sübutudur. Onlara karvansaraylar, məqbərələr kimi tarixi tikililərdə, həmçinin qəbir daşlarında rast gəlinir.

Film CBC telekanalı tərəfindən ölkənin mədəni-tarixi sərvətlərinin tədqiqi və təbliği layihəsi olan “Naməlum Azərbaycan” silsiləsi çərçivəsində hazırlanaraq ərsəyə gəlib. Bu layihənin filmləri keçmişin, tarixin, mədəniyyətin və təbiətin az öyrənilmiş səhifələrini açır, tamaşaçılara Azərbaycan irsinə bənzərsiz baxışları təqdim edir.

“Naməlum Azərbaycan” layihəsinin müəllifi tarixçi və tədqiqatçı Vahid Şükürov məqsədlərinin ölkənin öyrənilməmiş guşələrini, zəngin tarixini, memarlıq abidələrini və mədəni ənənələrini geniş auditoriyaya təqdim etmək olduğunu bildirib. O deyib: “Bu layihə çərçivəsində hər bir əsər tarixi və təbii obyektlərin Azərbaycanın görkəmini necə formalaşdırdığını nümayiş etdirən əsrlərə səyahətdir. Ölkənin Türk dünyası tarixindəki əhəmiyyətini təsdiqləyən belə səyahətlərdən biri də “Azərbaycan ərazisində Türk damğaları” filmidir. Onun nüfuzlu kinofestivalın finalına vəsiqə qazanması milli mədəni irsin qorunub saxlanmasının və beynəlxalq səviyyədə təbliğinin vacibliyini göstərir”.

Qeyd edək ki, ORION Beynəlxalq Film Festivalı hər il müstəqil kinorejissorları bir araya gətirir, onlara yaradıcı ifadə və mədəni dialoq üçün platforma təqdim edir. Festival geniş janrları əhatə edir və yeni istedadları kəşf etmək, onların məharətini, yaradıcılığını və bədii müxtəlifliyini qiymətləndirmək məqsədi daşıyır.