İngilis yazıçısı Ceyn Ostin 16 dekabr 1775-ci ildə Böyük Britaniyada anadan olub. O, 1783-cü ildə təhsilinə Oksfordda başlayıb, Sauzamptonda davam edib, ən sonunda isə qızlar məktəbində oxuyub. Kənd keşişinin yeddinci uşağı olan Ceyn öz dövrünə uyğun gözəl təsvirlər və obrazlar yaratdığına görə romanları klassiklər sırasında yer almağı bacarıb. 1805-ci ildə atasının ölümündən sonra əvvəlcə Sauzamptona, 1809-cu ildə isə varlı qardaşının yanına köçür. Həmin ev günümüzdə ev muzeyi kimi fəaliyyət göstərək, turistlərin sıx ziyarət etdiyi məkanlardan sayılır.1789-cu ildən roman yazmağa başlayan Ceynin romanlarının baş qəhrəmanları qadınlardır, əsərlər hər zaman xoşbəxt evliliklə başa çatır.

İlk olaraq “Eşq və yaşam” adlı kitabı nəşr edilib, daha sonra isə bu siyahını “Qürur və qərəz”, “Mansfild parkı”, “Emma” davam etdirib.

1816-cı ilin əvvəlindən özünü pis hiss etməyə başlayan Ceyn, əvvəlcə öz xəstəliyini danır, çalışmağa, ənənəvi ailə fəaliyyətlərində iştirak etməyə davam edir. Lakin xəstəliyi get-gedə irəliləyir, xəstəliyinə çarə tapmayan ailəsi 1817-ci il iyulun 18-də Ceyni itirir.

Ceyn Ostin hələ də haqlı olaraq ingilis ədəbiyyatının “Birinci xanımı” hesab edilir. Onun əsərləri Böyük Britaniyanın bütün kollec və universitetlərində məcburi oxunan ədəbiyyatlar siyahısındadır, kitabları şedevr kimi qəbul edilir, süjetin səmimiliyi və sadəliyi ilə cəlb edir.

Ceyn Ostinin ən maraqlı əsərlərini təqdim edirik:

“Emma”

“Emma”  Ceyn Ostinin ən yaxşı əsəri sayılır, onun yaradıcılığının zirvəsi hesab edilir. Romandakı hadisələr varlı mülkədar Vudhausun Emma adlı qızının ətrafında cərəyan edir. Bu hekayətin kifayət qədər tipik olmayan qəhrəmanı kasıb deyil, onun hər şeyi var – yaxşı evi, sevən atası, var-dövləti, – yalnız əri yoxdur. O, ümumiyyətlə, öz həyatından tam razıdır, buna görə də kiməsə vurulmaq, ərə getmək arzusu yoxdur. Əvəzində onu əhatə edən insanların romantik hekayətlərinə qarışmağı daha çox sevir. “Emma” kitabının qəhrəmanı öz niyyətinə elə aludə olur ki, ətrafında baş verənləri görə bilmir. Bu onu tez-tez pis vəziyyətə salır.

“Qürur və qərəz”

Məşhur yazıçı Ceyn Ostinin “Qürur və qərəz” romanı yetərincə maraqlı və son dərəcə həyati əsərdir. Ən başlıcası isə odur ki, yazıçı bütün başqa qələm sahiblərindən fərqli olaraq oxucusunun psixi-emosional dünyasına təcavüz edib, onun hiss və duyğularıyla oynamır. Hadisələr romantik, sakit bir axarda cərəyan edir. Ağlı, qüruru, bitkin xarakteriylə hamıda rəğbət oyadan qəhrəman Miss Bennet isə gənc qızlara ən yaxşı nümunə ola bilər.

“Düşüncə və Hissiyyat”

Bir-birinə qətiyyən bənzəməyən, biri hissləri, digəri isə düşüncə­ləri ilə yaşayan iki bacının qarışıq sevgi münasibətləri və yaşadıqları səs-küylü hadisələrdən bəhs edən “Düşüncə və hissiyyat” o dövrdə də gənc qızların, qadınların marağına səbəb olur və bundan sonra da hələ neçə-neçə nəsillər boyu qadınların bu kitaba marağı itmir. Zadəgan dəvətlərində, ədəbiyyat salonlarında, hətta kənd yerlərində bu roman dillər əzbəri olur